റോഡ് സുരക്ഷാ മാസാചരണം; ബോധവൽക്കരണ ക്ലാസ്സ് സംഘടിപ്പിച്ച് തളിപ്പറമ്പ സബ് റീജ്യണൽ ട്രാൻസ്പോർട്ട് ഓഫീസ്. #Road_Safety

തളിപ്പറമ്പ : മോട്ടോർ വാഹന വകുപ്പ് തളിപ്പറമ്പ സബ് റീജ്യണൽ ട്രാൻസ്പോർട്ട് ഓഫീസിന്റെ നേതൃത്വത്തിൽ ഹെവി എക്വിപ്മെന്റ് ട്രെയിനിങ്ങ് ഇൻസ്റ്റിറ്റ്യൂട്ട് ആയ തളിപ്പറമ്പ നാടുകാണി കിൻഫ്ര പാർക്കിലെ ഹാം ഇൻസ്റ്റിറ്റ്യൂട്ടിന്റെ സഹകരണത്തോടെ റോഡ് സുരക്ഷാ മാസാചരണത്തിന്റെ ഭാഗമായി ബോധവൽക്കരണ ക്ലാസ് സംഘടിപ്പിച്ചു. മികച്ച റോഡ് സൗകര്യങ്ങൾ വികസിച്ചു വരുന്നതോടൊപ്പം അപകട നിരക്കും വർദ്ധിക്കുന്നതിന്റെ പശ്ചാത്തലത്തിലാണ് ഇത്തരത്തിൽ വിവിധ പരിപാടികൾ വകുപ്പ് സംഘടിപ്പിച്ചു വരുന്നത്. റോഡ് ഉപഭോക്താക്കളിലേക്ക് ഏറ്റവും ലളിതമായ രീതിയിൽ ഗൗരവകരമായ  കാര്യങ്ങൾ എത്തിച്ചു നൽകുവാൻ സാധിക്കുന്ന തരത്തിലാണ് ബോധവൽക്കരണ പരിപാടികൾസംവിധാനം ചെയ്തിരിക്കുന്നത്.

അതിന്റെ ഭാഗമായാണ് മലബാറിലെ ആദ്യത്തെ ക്രെയിൻ ഫോർക്ക് ലിഫ്റ്റ് തുടങ്ങിയ ഹെവി എക്വിപ്മെന്റ് പഠന സ്ഥാപനമായ ഹാം ഇൻസ്റ്റിറ്റ്യൂട്ടിൽ ക്ലാസ്സ് സംഘടിപ്പിച്ചത്. പരിപാടിയിൽ മോട്ടോർ വെഹിക്കിൾ ഇൻസ്പെക്റ്റർ ശ്രീ. സുധാകരൻ ക്ലാസ് നയിച്ചു. ഹാം ഇൻസ്റ്റിറ്റ്യൂട്ട് മാനേജിങ്ങ് ഡയറക്റ്റർ മൊയ്ദു സ്വാഗതവും എച്ച്.ഒ.ഡി സുബിൻ സേവിയർ നന്ദിയും പറഞ്ഞു.

റോഡ് സുരക്ഷ വ്യക്തിഗത ഉത്തരവാദിത്തമെന്ന ബോധം വളർത്തുകയും, നിയമങ്ങൾ കൃത്യമായി പാലിക്കുന്ന ശീലങ്ങൾ ഡ്രൈവർമാരിലും റോഡ് ഉപയോക്താക്കളിലും ഉറപ്പാക്കുകയും ചെയ്യുക എന്ന ലക്ഷ്യത്തോടെ സംഘടിപ്പിച്ച ഈ ബോധവൽക്കരണ ക്ലാസ് പങ്കെടുത്തവർക്കിടയിൽ മികച്ച അവബോധം സൃഷ്ടിച്ചതായി അധികൃതർ വിലയിരുത്തി. ഇത്തരത്തിലുള്ള പരിശീലനവും ബോധവൽക്കരണ പ്രവർത്തനങ്ങളും തുടർച്ചയായി സംഘടിപ്പിക്കുന്നതിലൂടെ റോഡ് അപകടങ്ങൾ കുറയ്ക്കാനും സുരക്ഷിതമായ യാത്രാസംസ്കാരം സമൂഹത്തിൽ സ്ഥാപിക്കാനുമാകുമെന്ന് പരിപാടിയുടെ സംഘാടകർ അറിയിച്ചു.

ആലക്കോട് തിരഞ്ഞെടുപ്പ് ചൂടിലേക്ക് ; സ്ഥാനാർഥികളെ പ്രഖ്യാപിച്ച് മുന്നണികൾ, യുവ പ്രഫഷണലിനെ രംഗത്തിറക്കി ഇടതുപക്ഷം. #Alakode_Election

ആലക്കോട് : മലബാറിന്റെ കുടിയേറ്റ ചരിത്രത്തില്‍ പ്രത്യേക സ്ഥാനമുള്ള  ആലക്കോട് പഞ്ചായത്തിലെ പ്രധാന വാർഡുകളിലൊന്നായ ആലക്കോട് ടൗണിലെ സ്ഥാനാർത്ഥി നിർണയം മുന്നണികളില്‍ പൂര്‍ത്തിയായി. അഡ്വ. അനുപ്രിയ കൃഷ്‌ണയാണ് എൽ. ഡി. എഫ് സ്ഥാനാർത്ഥി. തളിപ്പറമ്പ് ബാറിലെ അഭിഭാഷകയായ അനുപ്രിയ കൊട്ടയാട് കവല നരിയൻപാറ സ്വദേശിനിയാണ്. ആലക്കോട്ടെ കലാ-സാംസ്കാരിക നാടക പ്രവർത്തക കൂടിയാണ്. 

കോൺഗ്രസ് ആലക്കോട് ബ്ലോക്ക് സെക്രട്ടറി അപ്പുക്കുട്ടൻ സ്വാമിമഠമാണ് യു.ഡി.എഫ് സ്ഥാനാർത്ഥി. ദീർഘകാലമായി ആലക്കോടിന്റെ രാഷ്ട്രീയ-സാ മൂഹ്യ മേഖലകളിൽ സജീവ സാന്നിധ്യമായ അപ്പുക്കുട്ടനെ ടൗൺ വാർഡിലെ സ്ഥാനാർത്ഥിയാക്കുന്നതിന് ഇന്നലെ ആലക്കോട് ചേർന്ന കോൺഗ്രസ് യോഗത്തിലാണ് തീരുമാനമായത്. ബി. ജെ.പി നേതാവ് സി.ജി. ഗോപനാണ് എൻ. ഡി.എ സ്ഥാനാർത്ഥി. മൂന്ന് മുന്നണികളു ടെയും സ്ഥാനാർത്ഥികളെക്കുറിച്ചുള്ള ചിത്രം തെളിഞ്ഞതോടെ ടൗൺ വാർഡിൽ മത്സരം മുറുകിയിരിക്കുകയാണ്.

മറ്റ് രണ്ടു സ്ഥാനാര്‍ഥികളേക്കാള്‍ യുവത്വമാണ് എല്‍ഡി എഫ് സ്ഥാനാര്‍ഥിയായ അഡ്വ. അനുപ്രിയ കൃഷ്ണയെ വ്യത്യസ്ഥയാക്കുന്നത്. പ്രൊഫഷണല്‍ യോഗ്യതയോടൊപ്പം ആലക്കോടിന്റെ കലാ സാംസ്‌കാരിക സാമൂഹിക മേഖലകളില്‍ നിറ സാന്നിധ്യം കൂടിയാണ് അഡ്വ. അനുപ്രിയ. പ്രസിഡന്റ് സ്ഥാനം വനിതാ സംവരണമായുള്ള പഞ്ചായത്തായ ആലക്കോട് അഡ്വ. അനുപ്രിയ  വിജയിച്ചാല്‍ പഞ്ചായത്ത് പ്രസിഡന്റ് സ്ഥാനം തന്നെ ലഭിക്കുമെന്നതില്‍ സംശയമില്ലെന്ന് അണികളും ഉറപ്പിച്ചു കഴിഞ്ഞു.

നിലവിൽ എൽ.ഡി.എഫിന്റെ സിറ്റിംഗ് വാർഡാണ് ആലക്കോട് ടൗൺ, പഞ്ചായത്തിന്റെ തിരഞ്ഞെടുപ്പ് ചിത്രം പൂര്‍ത്തിയായി വരുന്നതിനനുസരിച്ച് പ്രചാരണവും ചൂടുപിടിച്ചു കഴിഞ്ഞു. സ്ഥാനാര്‍ഥി പ്രഖ്യാപനം പൂര്‍ത്തിയായ വാര്‍ഡുകളില്‍ ഒന്നാം ഘട്ട പ്രചാരണ പ്രവര്‍ത്തനങ്ങള്‍ പൂര്‍ത്തിയായി വരുന്നു.

#HAPPY_DRINKS : പ്രകൃതിദത്ത പാനീയങ്ങൾ ആസ്വദിക്കാം, നിർമ്മിക്കാം.. ഇതാ #ഹാപ്പി_ഡ്രിങ്ക്സ് ഫെസ്റ്റിവലുമായി ഒരു ഗവണ്മെന്റ് യുപി സ്ക്കൂൾ..

ആലക്കോട് : ഒറ്റത്തൈ ഗവ.യു.പി സ്കൂളിൽ നടന്ന പ്രകൃതിദത്ത പാനീയങ്ങളുടെ നിർമ്മാണ പരിശീലനവും പ്രദർശനവും 'ഹാപ്പി ഡ്രിങ്ക്സ് ' ശ്രദ്ധേയമായി. കുട്ടികളിൽ ജങ്ക് ഫുഡ്, കൃത്രിമ പാനീയം എന്നിവയോടുള്ള അമിതാസക്തി കുറയ്ക്കുന്നതിന്  സർവ്വശിക്ഷാ കേരളം സ്കൂളുകളിൽ നടപ്പിലാക്കുന്ന പദ്ധതിയാണ് ഹാപ്പി ഡ്രിങ്ക്സ്.. പ്രാദേശികമായി ലഭ്യമാവുന്ന പ്രകൃതിദത്തമായ വസ്തുക്കൾ ഉപയോഗിച്ച് ബദൽ പാനീയങ്ങൾ നിർമ്മിക്കാൻ വിദ്യാർത്ഥികളെ പ്രാപ്തരാക്കുക എന്നതാണ് ഹാപ്പി ഡ്രിങ്ക് സിലൂടെ ലക്ഷ്യമിടുന്നത്.

ഇഞ്ചി, പപ്പായ, തക്കാളി, ഓറഞ്ച്, ആപ്പിൾ, പേരക്ക, പൈനാപ്പിൾ, ബീറ്റ്റൂട്ട്, ക്യാരറ്റ്, തണ്ണി മത്തൻ, കപ്പ, നെല്ലിക്ക, ചാമ്പക്ക, നാളികേരം, കശുമാങ്ങ, പാഷൻ ഫ്രൂട്ട്, പൊതിന, കറിവേപ്പില, നന്നാറി, ചെമ്പരത്തി പൂവ് എന്നിവ കൊണ്ടുള്ള വിവിധ രുചിയിലും നിറങ്ങളിലുമുള്ള മധുര പാനീയങ്ങളും മോര്, കഞ്ഞി വെള്ളം, ചെറുനാരങ്ങ, മാങ്ങ, നെല്ലിക്ക എന്നിവ ഉപയോഗിച്ചുള്ള സംഭാരങ്ങളും നിർമ്മിച്ചു. മധുരത്തിനായി തേൻ ആണ് ഉപയോഗിച്ചത്.

പി ടി എ പ്രസിഡൻ്റ് ടി എം രാജേഷിൻ്റെ അധ്യക്ഷതയിൽ ആലക്കോട് പഞ്ചായത്ത് വികസന കാര്യ സ്ഥിരം സമിതി അധ്യക്ഷ കവിത ഗോവിന്ദൻ ഉദ്ഘാടനം ചെയ്തു, സ്കൂൾ ലീഡർ എബിൻ ജോമി, അധ്യാപക പ്രതിനിധികളായ കെ എൻ രാധാമണി, ലീല കെ, ഷീലാമ്മ ജോസഫ്, എൻ എസ് ചിത്ര, മുബീന പി.കെ, അൻസ ജയിംസ് എന്നിവർ സംസാരിച്ചു. പ്രധാനാധ്യാപിക എം കെ ഉമാദേവി സ്വാഗതവും സ്റ്റാഫ് സെക്രട്ടറി കെ ആർ രശ്മി നന്ദിയും പറഞ്ഞു.

#കണ്ണൂർ ജില്ലയിലെ വിദ്യാഭ്യാസ സ്ഥാപനങ്ങൾക്ക് വെള്ളിയാഴ്ച്ച (05 ആഗസ്റ്റ് 2022) അവധി. | #Heavy_Rain #Kannur

കണ്ണൂർ ജില്ലയിലെ പ്രൊഫഷണല്‍ കോളേജുകള്‍ ഉള്‍പ്പെടെയുള്ള വിദ്യാഭ്യാസ സ്ഥാപനങ്ങള്‍ക്ക് വെള്ളിയാഴ്ച (05 ആഗസ്റ്റ് 2022) അവധിയായിരിക്കും. മുന്‍കൂട്ടി നിശ്ചയിച്ച പരീക്ഷകള്‍ക്കും, ഇന്റര്‍വ്യൂകള്‍ക്കും മാറ്റമുണ്ടായിരിക്കില്ല.