ഇന്നത്തെ പത്രങ്ങളിലെ പ്രധാന വാർത്തകളും സംഭവങ്ങളും ഒറ്റനോട്ടത്തിൽ - 02 ഒക്ടോബർ 2025 | #NewsHeadlines

• ഇന്ന് രാഷ്ട്രപിതാവ് മഹാത്മാ ഗാന്ധിയുടെ 156-ാം ജന്മദിനം. ഒരു ആയുഷ്‌കാലം മുഴുവന്‍ സത്യത്തിനും അഹിംസയ്ക്കും വേണ്ടി നിലകൊണ്ട്, രാജ്യത്തിന് സ്വാതന്ത്ര്യം നേടിക്കൊടുത്ത മഹാനാണ് മോഹന്‍ദാസ് കരംചന്ദ് ഗാന്ധി എന്ന മഹാത്മാ ഗാന്ധി. ഗാന്ധിജിയോടുള്ള ആദരസൂചകമായി ഐക്യരാഷ്ട്രസഭ ഇതേ ദിവസം അന്താരാഷ്ട്ര അഹിംസാദിനമായി ആചരിക്കുന്നു.

• ഇന്ന്‌ വിജയദശമി, കുരുന്നുകള്‍ അറിവിന്റെ ലോകത്തേക്ക് ചുവടുവെക്കുന്ന വിദ്യാരംഭം ഇന്നാണ്. ഭാഷാപിതാവിന്റെ മണ്ണായ തിരൂര്‍ തുഞ്ചന്‍പറമ്പില്‍ ആയിരത്തിലധികം കുരുന്നുകളാണ് ആദ്യാക്ഷരം കുറിയ്ക്കാനെത്തിയത്. രാവിലെ അഞ്ചുമണിയ്ക്ക് എഴുത്തിനിരുത്ത് ചടങ്ങുകള്‍ ആരംഭിച്ചു.

• കേരളത്തിന് വീണ്ടും കേന്ദ്ര അവഗണന: കേന്ദ്ര ദുരിതാശ്വാസ സഹായത്തിൽ വയനാടിന് അനുവദിച്ചത് 260.56 കോടി മാത്രം, കേരളം ആവശ്യപ്പെട്ടത് 2221 കോടി.

• ലക്ഷക്കണക്കിന് അമേരിക്കാരുടെ ആശങ്കകൾ യാഥാർഥ്യമായി. അമേരിക്കയിൽ ഷട്ട് ഡൗൺ നിലവിൽ വന്നു. ട്രംപ് സർക്കാരിന്‍റെ പ്രവര്‍ത്തനങ്ങള്‍ക്കായുള്ള പണം അനുവദിക്കുന്ന ധനബില്ല് പാസാകാതെ വന്നതോടെയാണ് യുഎസ് സർക്കാർ ‘ഷട്ട് ഡൗണി’ലേക്ക് നീങ്ങിയത്.

• റഷ്യൻ പ്രസിഡന്റ് വ്ലാദിമിർ പുടിൻ ഇന്ത്യയിലേക്ക്. ഇന്ത്യ-റഷ്യ ഉച്ചകോടിക്കായാണ് ഡിസംബർ 5-6 തീയതികളിൽ അദ്ദേഹം ഇന്ത്യയിലേക്ക് എത്തുക.

• സംസ്ഥാനത്ത് സ്വർണവില റെക്കോർഡ് കുതിപ്പിലേക്ക്. ഒരു പവൻ സ്വർണത്തിന് ഇന്നലെ വർധിച്ചത് 440 രൂപയാണ്. ഇതോടെ ഒരു പവൻ സ്വർണത്തിന് 87,440 രൂപയായി.

• രാജസ്ഥാനിൽ സർക്കാർ ആശുപത്രിയിൽ നിന്നും നൽകിയ ചുമയ്ക്കുള്ള മരുന്ന് കഴിച്ച് രണ്ട് കുട്ടികൾക്ക് ദാരുണാന്ത്യം. മരുന്നിന് കുഴപ്പമില്ലെന്നു തെളിയിക്കാനായി കഴിച്ച ഡോക്ടർ അബോധാവസ്ഥയിൽ ചികിത്സയിൽ.

• ജിസിസി രാജ്യങ്ങളിലേക്കുള്ള ഏകീകൃത ടൂറിസ്റ്റ് വിസ പരീക്ഷണാടിസ്ഥാനത്തിൽ ഈ വർഷം ആരംഭിക്കുമെന്ന് യുഎഇ സാമ്പത്തിക ടൂറിസം മന്ത്രിയും, എമിറേറ്റ്സ് ടൂറിസം കൗൺസിൽ ചെയർമാനുമായ അബ്ദുള്ള ബിൻതൗക്ക് അൽമാരി പറഞ്ഞു.

• രാജ്യത്ത് വാണിജ്യ സിലിന്‍ഡറിന് വില കുത്തനെ വര്‍ധിപ്പിച്ചു. 19 കിലോഗ്രാം സിലിന്‍ഡറിന് 15.50 രൂപയാണ് വര്‍ധിപ്പിച്ചത്. ഡല്‍ഹിയില്‍ വാണിജ്യ എല്‍പിജി സിലിണ്ടര്‍ വില 1595.50 രൂപയായി ഉയര്‍ന്നു.

• ചൂരൽമല, മുണ്ടക്കൈ പുനരധിവാസം ജനുവരിയിൽ പൂർത്തിയാക്കുമെന്ന് മുഖ്യമന്ത്രി പിണറായി വിജയൻ പറഞ്ഞു. ഉരുൾപൊട്ടലുമായി ബന്ധപ്പെട്ട് 2,221 കോടിയുടെ സഹായം ആവശ്യപ്പെട്ട് കേന്ദ്രത്തിന് നിവേദനം നൽകിയിരുന്നു. എന്നാൽ, 265 കോടി തരാമെന്നാണ് കേന്ദ്രം അറിയിച്ചത്. പക്ഷേ ആ തുകയും ഇതുവരെ ലഭിച്ചിട്ടില്ലെന്നും മുഖ്യമന്ത്രി നിയമസഭയിൽ ചോദ്യോത്തരവേളയിൽ പറഞ്ഞു.

• വിവാദമായ പ്രത്യേക തീവ്ര വോട്ടര്‍ പട്ടിക പുതുക്കലിന് ഒടുവില്‍ ബിഹാറിലെ അന്തിമ വോട്ടര്‍ പട്ടിക പുറത്തിറക്കിയപ്പോള്‍ വന്‍തോതില്‍ വോട്ടര്‍മാരുടെ എണ്ണം കൂടി. കരട് പട്ടികയെ അപേക്ഷിച്ച് 21.53 ലക്ഷം പേരാണ് അന്തിമ പട്ടികയിൽ കൂടുതലായുള്ളത്.

• ഐസിസി ടി 20 റാങ്കിങ്ങിൽ മലയാളി താരം സഞ്ജു സാംസണിന് നേട്ടം. എട്ട് സ്ഥാനങ്ങള്‍ മെച്ചപ്പെടുത്തിയ താരം 31-ാം സ്ഥാനത്തേക്ക് കയറി. ഇന്ത്യന്‍ വൈസ് ക്യാപ്റ്റന്‍ ശുഭ്മാന്‍ ഗില്ലിനെ മറികടക്കാനും സഞ്ജുവിന് കഴിഞ്ഞു. 32-ാം സ്ഥാനത്താണ് ഗില്‍. 568 പോയിന്റാണ് സഞ്ജുവിനുള്ളത്.