ന്യൂഡൽഹി: ലോകം തൊഴിലാളി ദിനം ആചരിക്കുമ്പോൾ ഇന്ത്യയിലെ തൊഴിലാളി വർഗം ശക്തമായ സമരപാതയിലാണ്. ഷിക്കാഗോ തൊഴിലാളി സമരത്തിന് 140 വർഷം തികയുന്ന ഈ മെയ് ദിനം, തൊഴിലാളികളുടെ അവകാശ പോരാട്ടങ്ങൾക്ക് പുതിയ ഉണർവാണ് നൽകുന്നത്. കോർപറേറ്റ് താൽപര്യങ്ങൾക്ക് അനുകൂലമായി കേന്ദ്ര സർക്കാർ നടപ്പിലാക്കിയ നാല് തൊഴിൽ കോഡുകൾക്കെതിരെ രാജ്യവ്യാപകമായി പ്രതിഷേധങ്ങൾ ശക്തമാകുന്നു.
മിനിമം വേതന വർധന ഉൾപ്പെടെയുള്ള അടിസ്ഥാന അവകാശങ്ങൾ ആവശ്യപ്പെട്ട് തൊഴിലാളികൾ തൊഴിലിടങ്ങളിൽ നിന്ന് തെരുവുകളിലേക്ക് ഇറങ്ങുകയാണ്. രാജ്യത്തെ വിവിധ മേഖലകളിൽ സമരങ്ങൾ ശക്തിപ്പെടുകയും തൊഴിലാളി സംഘടനകൾ ഏകോപിത നീക്കങ്ങൾ ആരംഭിക്കുകയും ചെയ്തിട്ടുണ്ട്. വർഗസമരത്തിന്റെ തീ വർധിച്ചാൽ രാജ്യത്തെ തൊഴിലാളി പ്രസ്ഥാനം ചരിത്രപരമായ ഉയിർത്തെഴുന്നേൽപ്പിലേക്ക് കടക്കുമെന്ന പ്രതീക്ഷയിലാണ് പ്രവർത്തകർ.
ഏപ്രിൽ 9ന് രാജ്യതലസ്ഥാനത്തിന് സമീപമായ നോയിഡയിൽ നടന്ന പ്രതിഷേധം തൊഴിലാളി അസംതൃപ്തിയുടെ ഉദാഹരണമായി മാറി. ഫാക്ടറികളും പ്രധാന റോഡുകളും ഉപരോധിച്ച് തൊഴിലാളികൾ ശക്തമായ പ്രതിഷേധം സംഘടിപ്പിച്ചു. പ്രതിഷേധത്തെ അടിച്ചമർത്താൻ ശ്രമിച്ച ഉത്തർപ്രദേശ് പോലീസിന്റെ നടപടി വിവാദങ്ങൾക്കിടയാക്കി.
കേന്ദ്ര സർക്കാരിന്റെ തൊഴിലാളി വിരുദ്ധ നയങ്ങളാണ് രാജ്യത്ത് വർധിച്ചുവരുന്ന ഈ അസംതൃപ്തിക്ക് പ്രധാന കാരണമെന്നതാണ് തൊഴിലാളി സംഘടനകളുടെ ആരോപണം. തൊഴിൽ കോഡുകൾ പിൻവലിക്കണമെന്നും, മിനിമം വേതനം വർധിപ്പിക്കണമെന്നും ആവശ്യപ്പെട്ട് രാജ്യവ്യാപകമായി സമരങ്ങൾ ശക്തമാകുന്ന സാഹചര്യത്തിലാണ് ഈ മെയ് ദിനം കടന്നുപോകുന്നത്.
വാര്ത്തകളെ വാര്ത്തകളായി മാത്രം വായനക്കാരിലേക്ക് എത്തിക്കുന്ന ഒരു സ്വതന്ത്ര മാധ്യമ സംവിധാനമാണ് മലയോരം ന്യൂസ്.
