കണ്ണൂർ : വേനൽ കടുത്തതോടെ ശീതളപാനീയ വിപണിയും വെള്ള വിൽപനയും സജീവമാണ്. ബേക്കറികളിലും സ്റ്റാളുകളിലും പെട്ടിക്കടകളിലും ഹോട്ടലുകളിലും ഉൾപ്പെടെ ദാഹം ശമിപ്പിക്കുന്ന ജ്യൂസിനും സിറപ്പിനും ആവശ്യക്കാർ വർധിച്ചു. പാതയോരങ്ങളിൽ ശീതളപാനീയ വിൽപ്പന കേന്ദ്രങ്ങളും തുടങ്ങി. കുപ്പിവെള്ളത്തിന്റെ ആവശ്യവും വർധിച്ചു. തണ്ണിമത്തൻ, മുന്തിരി, അച്ചാർ വെള്ളരി, മുസംബി, സംഭാരം, സർബത്ത് തുടങ്ങിയ ജ്യൂസുകൾ വർധിച്ചു. പലയിടത്തും വിലയിൽ നേരിയ വർധനവുമുണ്ട്. കുലുക്കി സർബത്തും കരിമ്പ് ജ്യൂസും പ്രിയങ്കരമാണ്. കടകളിലും ഹോട്ടലുകളിലും ബസ് സ്റ്റാൻഡുകളിലും ട്രെയിനുകളിലും കുപ്പിവെള്ളം വിൽക്കുന്നുണ്ട്. വ്യാപാര സ്ഥാപനങ്ങളിലും ഓഫീസുകളിലും മറ്റ് സ്ഥാപനങ്ങളിലും സ്ഥാപിച്ചിട്ടുള്ള 20 ലിറ്റർ കുടിവെള്ള കുപ്പികളുടെ വിൽപ്പനയും മുൻ മാസങ്ങളെ അപേക്ഷിച്ച് ഇരട്ടിയായി.
പാതയോരങ്ങളിൽ കരിമ്പ്, പനം നങ്ക് വിൽപനയും സജീവമാണ്. ഷവർമ്മയുൾപ്പടെ ഭക്ഷ്യ വിഭവങ്ങൾ മരണകാരണമായപ്പോൾ സംസ്ഥാനത്തെ ഹോട്ടലുകളിൽ ഭക്ഷ്യസുരക്ഷാ വിഭാഗവും ആരോഗ്യവകുപ്പും കഴിഞ്ഞ മാസങ്ങളിൽ പരിശോധന നടത്തി ശക്തമായ നടപടികൾ സ്വീകരിച്ചിരുന്നു. അതുപോലെ സോഫ്റ്റ് ഡ്രിങ്ക് ഔട്ട്‌ലെറ്റുകളിലും പരിശോധന ആവശ്യമാണ്. വൃത്തിഹീനമായ സാഹചര്യത്തിലും പാതയോരങ്ങളിലുൾപ്പെടെ ശുചിത്വം പാലിക്കാതെയുമാണ് കടകൾ പ്രവർത്തിക്കുന്നത്. ഉപയോഗിക്കുന്ന വെള്ളവും ഐസും ഗുണനിലവാരം പരിശോധിക്കണം. കുടിവെള്ളക്ഷാമം രൂക്ഷമാകുമ്പോഴും കാര്യമായ ക്ഷാമമില്ലാതെയാണ് കുപ്പിവെള്ളം വിപണിയിലെത്തുന്നത്. അടുത്തിടെ ടാങ്കർ ലോറികളിൽ വിതരണം ചെയ്യുന്ന കുടിവെള്ളം ഉപയോഗിച്ച ആളുകൾക്ക് ശാരീരിക അസ്വസ്ഥതകളും വയറിളക്കവും ഛർദ്ദിയും ഉണ്ടായി. സീസൺ കണക്കിലെടുത്ത് കുടിവെള്ള സ്രോതസ്സുകളിലും പാക്കിംഗ് യൂണിറ്റുകളിലും മാനദണ്ഡങ്ങൾ പാലിക്കാതെയാണ് കുടിവെള്ളം വിതരണം ചെയ്യുന്നതെന്ന് ഉത്തരവാദിത്തപ്പെട്ട ഏജൻസികൾ പരിശോധന ശക്തമാക്കണമെന്നും ആവശ്യമുയർന്നിട്ടുണ്ട്.
വാര്ത്തകളെ വാര്ത്തകളായി മാത്രം വായനക്കാരിലേക്ക് എത്തിക്കുന്ന ഒരു സ്വതന്ത്ര മാധ്യമ സംവിധാനമാണ് മലയോരം ന്യൂസ്.