തിരുവനന്തപുരം: സംസ്ഥാനത്തെ 5 ആരോഗ്യ സ്ഥാപനങ്ങൾക്ക് കൂടി ദേശീയ ഗുണനിലവാര അക്രഡിറ്റേഷൻ ലഭിച്ചതായി ആരോഗ്യ മന്ത്രി വീണ ജോർജ് അറിയിച്ചു. ഇതിൽ 2 ആരോഗ്യ സ്ഥാപനങ്ങൾക്ക് പുതുതായി ദേശീയ ഗുണനിലവാര അഷ്വറൻസ് സ്റ്റാൻഡേർഡ്സ് (NQAS) അംഗീകാരം ലഭിച്ചു, 3 ആരോഗ്യ സ്ഥാപനങ്ങൾക്ക് 3 വർഷത്തിനുശേഷം വീണ്ടും അംഗീകാരം കിട്ടി. ഇതോടെ, സംസ്ഥാനത്തെ NQAS നേടുന്ന ആരോഗ്യ സ്ഥാപനങ്ങളുടെ എണ്ണം 253 ആയി. സംസ്ഥാനത്തെ 8 ജില്ലാ ആശുപത്രികൾ, 6 താലൂക്ക് ആശുപത്രികൾ, 13 കമ്മ്യൂണിറ്റി ഹെൽത്ത് സെന്ററുകൾ, 46 നഗര കുടുംബാരോഗ്യ കേന്ദ്രങ്ങൾ, 163 കുടുംബാരോഗ്യ കേന്ദ്രങ്ങൾ, 17 പൊതുജനാരോഗ്യ കേന്ദ്രങ്ങൾ എന്നിവയ്ക്കാണ് അംഗീകാരം.
കുന്നത്തുകാൽ കുടുംബാരോഗ്യ കേന്ദ്രം (94.42 ശതമാനം), മലപ്പുറം ആനക്കയം പൊതുജനാരോഗ്യ കേന്ദ്രം (88.35 ശതമാനം) എന്നിവയ്ക്ക് പുതുതായും, പാലക്കാട് കല്ലടിക്കോട് കുടുംബാരോഗ്യ കേന്ദ്രം (90.60 ശതമാനം), കൊല്ലം മുണ്ടയ്ക്കൽ അർബൻ പ്രൈമറി ഹെൽത്ത് സെന്റർ (93.25 ശതമാനം), കൊല്ലം ഉളിയക്കോവിൽ അർബൻ പ്രൈമറി ഹെൽത്ത് സെന്റർ (95.36 ശതമാനം) എന്നിവയ്ക്ക് മാനദണ്ഡങ്ങൾക്കനുസൃതമായി ഗുണനിലവാരം ഉറപ്പാക്കിയ ശേഷം പുനഃക്രമീകരിക്കുകയും ചെയ്തു.
NQAS അക്രഡിറ്റേഷന് മൂന്ന് വർഷത്തെ കാലാവധിയുണ്ട്. മൂന്ന് വർഷത്തിന് ശേഷം, ദേശീയ സംഘത്തിന്റെ പുനഃപരിശോധന ഉണ്ടാകും. കൂടാതെ, എല്ലാ വർഷവും സംസ്ഥാനതല പരിശോധനയും ഉണ്ടാകും. ഇത് കർശനമായി പാലിക്കുന്ന സ്ഥാപനങ്ങൾക്ക് മാത്രമേ പുനഃക്രമീകരിക്കൂ. NQAS അക്രഡിറ്റേഷൻ ലഭിക്കുന്ന കുടുംബാരോഗ്യ കേന്ദ്രങ്ങൾ/നഗര പ്രാഥമികാരോഗ്യ കേന്ദ്രങ്ങൾക്ക് ഓരോ പാക്കേജിനും 18,000 രൂപ വീതവും മറ്റ് ആശുപത്രികൾക്ക് ഒരു കിടക്കയ്ക്ക് 10,000 രൂപ വീതവും ലഭിക്കും.
വാര്ത്തകളെ വാര്ത്തകളായി മാത്രം വായനക്കാരിലേക്ക് എത്തിക്കുന്ന ഒരു സ്വതന്ത്ര മാധ്യമ സംവിധാനമാണ് മലയോരം ന്യൂസ്.