ബംഗാൾ ഉൾക്കടലിൽ രൂപം കൊണ്ട റമാൽ ചുഴലിക്കാറ്റ് പശ്ചിമ ബംഗാൾ തീരത്തേക്ക് പ്രവേശിച്ചു. ശക്തമായ കാറ്റിനും മഴയ്ക്കും സാധ്യതയുണ്ടെന്ന് മുന്നറിയിപ്പ് നൽകി. മണിക്കൂറിൽ 110 മുതൽ 120 കിലോമീറ്റർ വരെ വേഗത്തിലാണ് ഇപ്പോൾ കാറ്റ് വീശുന്നത്. കൊൽക്കത്ത വിമാനത്താവളം അടച്ചു. പശ്ചിമ ബംഗാളിൻ്റെ തീരപ്രദേശങ്ങളിലും റെഡ് അലർട്ട് പ്രഖ്യാപിച്ചിട്ടുണ്ട്. ബംഗ്ലാദേശിലെ ഖാപുപാറയ്ക്കും പശ്ചിമ ബംഗാളിലെ സാഗർ ദ്വീപിനും ഇടയിലാണ് റമാൽ ചുഴലിക്കാറ്റ് കരകയറിയത്. കൊൽക്കത്ത, ഹുബ്ലി, ഹൗറ എന്നിവിടങ്ങളിൽ കനത്ത മഴ. സൗത്ത് 24 പർഗാനാസ് ജില്ലയിൽ നിരവധി മരങ്ങൾ കടപുഴകി. ദേശീയ ദുരന്തനിവാരണ സേനയുടെ നേതൃത്വത്തിൽ മരങ്ങൾ മുറിച്ചു മാറ്റുന്ന നടപടി പുരോഗമിക്കുകയാണ്.
ആഘാതം ലഘൂകരിക്കാൻ മുൻകരുതൽ നടപടികൾ സ്വീകരിക്കണമെന്ന് ദുരന്ത നിവാരണ അതോറിറ്റി അസം, മേഘാലയ, ത്രിപുര, മിസോറാം, മണിപ്പൂർ സർക്കാരുകൾക്ക് മുന്നറിയിപ്പ് നൽകി. കഴിഞ്ഞ ദിവസം രാത്രി ബംഗ്ലാദേശിലെ മോംഗ്ലയുടെ തെക്ക് പടിഞ്ഞാറ് ഭാഗത്ത് സാഗർ ദ്വീപിനും ഖേപുപാറയ്ക്കും ഇടയിൽ വീശിയടിച്ച കൊടുങ്കാറ്റ് വൻ നാശനഷ്ടങ്ങൾ ഉണ്ടാക്കി. നൂറുകണക്കിന് വീടുകളിലും കൃഷിയിടങ്ങളിലും വെള്ളം കയറി. കൊൽക്കത്തയിലും ദക്ഷിണ ബംഗാളിലും വ്യോമ, റെയിൽ, റോഡ് ഗതാഗതം തടസ്സപ്പെട്ടു. ഈസ്റ്റേൺ, സൗത്ത് ഈസ്റ്റേൺ റെയിൽവേ നിരവധി ട്രെയിനുകൾ റദ്ദാക്കിയിട്ടുണ്ട്. കൊൽക്കത്ത നേതാജി സുഭാഷ് ചന്ദ്രബോസ് അന്താരാഷ്ട്ര വിമാനത്താവളത്തിൻ്റെ പ്രവർത്തനം 21 മണിക്കൂർ നിർത്തിവച്ചു. ഇന്ന് രാവിലെ 9 മണിക്ക് പ്രവർത്തനം പുനരാരംഭിക്കുമെന്ന് എയർപോർട്ട് അധികൃതർ ഇന്നലെ അറിയിച്ചു. കൊൽക്കത്തയിലെ ശ്യാമപ്രസാദ് മുഖർജി തുറമുഖവും താൽക്കാലികമായി അടച്ചു.
കനത്ത മഴയിൽ കൊൽക്കത്തയിലെ ബിബിർ ബഗാൻ മേഖലയിൽ മതിൽ ഇടിഞ്ഞുവീണ് ഒരാൾക്ക് പരിക്കേറ്റു. താഴ്ന്ന പ്രദേശങ്ങൾ വെള്ളത്തിനടിയിലായി. അസമിലും മറ്റ് വടക്കുകിഴക്കൻ സംസ്ഥാനങ്ങളിലും ഇന്നും നാളെയും ശക്തമായ മഴ പെയ്യുമെന്ന് മുന്നറിയിപ്പ് നൽകിയിട്ടുണ്ട്. വിവിധ ജില്ലകളിൽ ഓറഞ്ച്, റെഡ് അലർട്ടുകൾ പ്രഖ്യാപിച്ചിട്ടുണ്ട്. തെക്കൻ അസമിലും മേഘാലയയിലും ശക്തമായ കാറ്റ് വീശാൻ സാധ്യതയുണ്ട്.
ഒരുക്കങ്ങൾ അവലോകനം ചെയ്യാൻ പ്രധാനമന്ത്രി നരേന്ദ്ര മോദി ഉദ്യോഗസ്ഥരുമായി കൂടിക്കാഴ്ച നടത്തി. ചുഴലിക്കാറ്റ് ബാധിത പ്രദേശങ്ങളിൽ ദേശീയ ദുരന്ത നിവാരണ സേന സജ്ജമാണെന്ന് കേന്ദ്ര ആഭ്യന്തര മന്ത്രി അമിത് ഷാ അറിയിച്ചു.
മുൻകരുതലിൻ്റെ ഭാഗമായി ദക്ഷിണ ബംഗാൾ തീരത്ത് 14 എൻഡിആർഎഫ് സംഘങ്ങളെ വിന്യസിച്ചിട്ടുണ്ട്. ചുഴലിക്കാറ്റിനെ നേരിടാൻ കരസേന, നാവികസേന, കോസ്റ്റ് ഗാർഡ് തുടങ്ങിയ സേനകളും സജ്ജമാണ്. ത്രിപുരയിൽ നാല് ജില്ലകളിലും സംസ്ഥാന സർക്കാർ റെഡ് അലർട്ട് പ്രഖ്യാപിച്ചു.
വാര്ത്തകളെ വാര്ത്തകളായി മാത്രം വായനക്കാരിലേക്ക് എത്തിക്കുന്ന ഒരു സ്വതന്ത്ര മാധ്യമ സംവിധാനമാണ് മലയോരം ന്യൂസ്.