രോഹിത് ശർമ്മ-വിരാട് കോലി ജോഡിയെ ട്വൻ്റി 20 ലോകകപ്പിൽ ടീം ഇന്ത്യ ഓപ്പണർമാരായി പരിഗണിച്ചേക്കും. റയാൻ പരാഗും ഇന്ത്യൻ ടീമിൽ ഇടംപിടിക്കാൻ സാധ്യതയുണ്ടെന്നും റിപ്പോർട്ടുകളുണ്ട്. അജിത് അഗാർക്കർ അധ്യക്ഷനായ സെലക്ഷൻ കമ്മിറ്റി ഇക്കാര്യത്തിൽ ഗൗരവമായ ചർച്ചകൾ നടത്തിവരികയാണ്. ലോകകപ്പ് ടീമിനെ ഈ മാസം 30ന് പ്രഖ്യാപിച്ചേക്കും. അതിനുമുമ്പ് ഇന്ത്യൻ ക്യാപ്റ്റൻ രോഹിത് ശർമ്മ, കോച്ച് രാഹുൽ ദ്രാവിഡ്, അജിത് അഗാർക്കർ എന്നിവരുമായി കൂടിക്കാഴ്ച നടത്തിയിരുന്നു. ഐപിഎല്ലിൽ ഓപ്പണറായി വിരാട് കോഹ്‌ലിയുടെ പ്രകടനം മികച്ചതാണെന്ന് ബിസിസിഐ വിലയിരുത്തി. നേരത്തെ ജയ്‌സ്വാളിനെ ഓപ്പണറായി ബിസിസിഐ പരിഗണിച്ചിരുന്നു. എന്നാൽ ഐപിഎല്ലിലെ മോശം പ്രകടനത്തെ തുടർന്നാണ് കോഹ്‌ലിയെ ഓപ്പണിംഗ് സ്ഥാനത്തേക്ക് പരിഗണിച്ചത്. ഐപിഎല്ലിൽ രാജസ്ഥാനു വേണ്ടി മികച്ച പ്രകടനം നടത്തിയ റിയാൻ പരാഗിനെ ടീമിലെത്തിച്ചാൽ റിങ്കു സിംഗിൻ്റെ അവസരം നഷ്ടമായേക്കും.
ഒരു സെഞ്ചുറിയും രണ്ട് അർധസെഞ്ചുറികളുമടക്കം 361 റൺസാണ് കോഹ്‌ലി ഇതുവരെ നേടിയത്. ഐപിഎല്ലിൽ ഏറ്റവും കൂടുതൽ റൺസ് നേടിയ താരവും കോഹ്‌ലിയാണ്. മൂന്നാം നമ്പറിൽ നിന്ന് രണ്ടാം നമ്പറിലേക്ക് മാറുമ്പോൾ കോലിയുടെ പ്രകടനത്തിൽ മാറ്റമൊന്നും ഉണ്ടാകില്ലെന്നും ബിസിസിഐ വിലയിരുത്തുന്നു. ട്വൻ്റി20 ക്രിക്കറ്റിൽ ഇന്ത്യയുടെ ഓപ്പണറായി ഒമ്പത് മത്സരങ്ങളാണ് കോഹ്‌ലി കളിച്ചത്. ഒരു സെഞ്ചുറി ഉൾപ്പെടെ 400ലധികം റൺസ് ഓപ്പണറായി കോഹ്‌ലി നേടിയിട്ടുണ്ട്.
വാര്ത്തകളെ വാര്ത്തകളായി മാത്രം വായനക്കാരിലേക്ക് എത്തിക്കുന്ന ഒരു സ്വതന്ത്ര മാധ്യമ സംവിധാനമാണ് മലയോരം ന്യൂസ്.