രാജ്യത്തെ ഒരു ട്രാൻസ് പുരുഷന്റെ ആദ്യ ഗർഭമായി കണക്കാക്കപ്പെടുന്ന തങ്ങളുടെ ആദ്യ കുഞ്ഞിനെ സന്തോഷപൂർവ്വം വരവേറ്റ് കേരളത്തിലെ ട്രാൻസ്ജെൻഡർ ദമ്പതികൾ.
കഴിഞ്ഞ ദിവസം സിയ-സഹദ് ദമ്പതികൾ സോഷ്യൽ മീഡിയയിൽ പോസ്റ്റ് ചെയ്ത ഫോട്ടോഷൂട്ട് വൈറലായിരുന്നു.
പുരുഷനായി ജനിച്ച സിയയും സ്ത്രീയായി ജനിച്ച സഹദും ഒരുമിച്ച് ജീവിക്കാൻ തീരുമാനിച്ചതിന് ശേഷം ലിംഗമാറ്റ നടപടിക്രമങ്ങൾ പോലും ആരംഭിച്ചിരുന്നു. എന്നാൽ ഒരു കുട്ടി വേണമെന്ന ആഗ്രഹമാണ് ദമ്പതികളെ ഗർഭം ധരിക്കാൻ പ്രേരിപ്പിച്ചത്.
അപ്പോഴേക്കും സഹദ് ഹോർമോൺ തെറാപ്പി ആരംഭിക്കുകയും സ്തനങ്ങൾ നീക്കം ചെയ്യുകയും ഗർഭപാത്രം നീക്കം ചെയ്യാനൊരുങ്ങുകയും ചെയ്തു. എന്നാൽ അവർ ഡോക്ടർമാരുമായി കൂടിയാലോചിക്കുകയും കോഴിക്കോട് മെഡിക്കൽ കോളേജ് ആശുപത്രിയിലെ ചികിത്സയെ തുടർന്ന് സിയയിൽ നിന്ന് സഹദ് കുഞ്ഞിനെ ഗർഭം ധരിക്കുകയും ചെയ്തു.
കോഴിക്കോട് മെഡിക്കൽ കോളേജിലാണ് ചികിത്സയും പ്രസവവും നടന്നത്.
കുഞ്ഞ് ജനിച്ചെങ്കിലും ജെന്റർ ഏതെന്ന് പുറത്തുവിട്ടിട്ടില്ല.
"നിരവധി തടസ്സങ്ങൾ ഉണ്ടായിരുന്നെങ്കിലും, ജീവശാസ്ത്രപരമായ മാതാപിതാക്കളാകാനുള്ള ഞങ്ങളുടെ ആവേശത്തിന് അതിരുകളില്ല. ഡോക്ടർമാർ ഉൾപ്പെടെ നിരവധി ആളുകളിൽ നിന്ന് ഞങ്ങൾക്ക് നല്ല പിന്തുണ ലഭിക്കുന്നു," സിയ പറഞ്ഞു.
മലപ്പുറം ജില്ലക്കാരിയായ സിയ (21) ക്ലാസിക്കൽ നർത്തകിയാണ്. 23 കാരനായ സഹദ് തിരുവനന്തപുരം സ്വദേശിയാണ്. ട്രാൻസ്‌പേഴ്‌സൺമാരുടെ ഒത്തുചേരലുകളിൽ ഇരുവരും കണ്ടുമുട്ടാറുണ്ടായിരുന്നു. മൂന്ന് വർഷം മുമ്പാണ് ഇരുവരും ഒരുമിച്ച് ജീവിക്കാൻ തീരുമാനിച്ച് കോഴിക്കോട്ട് താമസമാക്കിയത്.
കഴിഞ്ഞ ദിവസം അവർ ഒരു മെറ്റേണിറ്റി ഫോട്ടോഷൂട്ടിന്റെ ചിത്രങ്ങൾ പോസ്റ്റ് ചെയ്യുകയും സോഷ്യൽ മീഡിയയിൽ വൈറലാവുകയും ചെയ്തു.
ചികിത്സകൾ വളരെ ചെലവേറിയതായതിനാൽ സർക്കാർ ഏജൻസികളിൽ നിന്ന് സഹായം പ്രതീക്ഷിക്കുന്നതായി സിയ പറഞ്ഞു. സഹദിന്റെ കുടുംബവും ഇവർക്ക് പിന്തുണ നൽകിയിരുന്നു.
പോസ്റ്റുകള്
