ഇരിട്ടി: ഉളിക്കൽ നുച്യാഡിൽ വൻ മയക്കുമരുന്ന് വേട്ട. കാറിൽ കടത്തിയ 15.66 ഗ്രാം എംഡിഎംഎയും 937 ഗ്രാം കഞ്ചാവുമായി യുവാവ് അറസ്റ്റിൽ. ഇരിട്ടിയിലെ നുച്യാടുള്ള പൊമ്മാനിച്ചി ഹൗസിൽ പി. മുബാഷിർ (31) അറസ്റ്റിലായി. എക്സൈസ് കമ്മീഷണർ സ്ക്വാഡ് അംഗമായ പി. ജലീഷിന് ലഭിച്ച രഹസ്യ വിവരത്തിന്റെ അടിസ്ഥാനത്തിലാണ് ഇയാളെ പരിശോധിച്ച് ന്യൂജെൻ സിന്തറ്റിക് മരുന്നുകൾ ഉൾപ്പെടെയുള്ള മയക്കുമരുന്നുകൾ പിടിച്ചെടുത്തത്.
എക്സൈസ് എൻഫോഴ്സ്മെന്റ് ആൻഡ് ആന്റി നാർക്കോട്ടിക് സ്പെഷ്യൽ സ്ക്വാഡ് ഓഫീസിലെ എക്സൈസ് ഇൻസ്പെക്ടർ എസ്. സിയാദിന്റെ നേതൃത്വത്തിലാണ് പരിശോധന നടത്തിയത്. ബെംഗളൂരുവിൽ നിന്ന് കടത്തിയ എംഡിഎംഎ, കഞ്ചാവ്, കാർ എന്നിവ കസ്റ്റഡിയിലെടുത്തു.
എക്സൈസ് കമ്മീഷണർ സ്പെഷ്യൽ സ്ക്വാഡ് നോർത്ത് സോൺ എക്സൈസ് സർക്കിൾ ഇൻസ്പെക്ടർ സിനു കൊയിലിയാട്ടിന്റെയും കേരള എടിഎസിന്റെയും ഉപദേശവും സഹായവും പ്രതിയെ അറസ്റ്റ് ചെയ്യാൻ സഹായിച്ചു. എംഡിഎംഎ വിൽക്കുന്നുണ്ടെന്ന വിവരത്തിന്റെ അടിസ്ഥാനത്തിൽ പ്രതി എക്സൈസിന്റെ നിരീക്ഷണത്തിലായിരുന്നു.
ഇന്നലെ രാവിലെയാണ് ഇയാൾ ബെംഗളൂരുവിൽ നിന്ന് സംസ്ഥാനത്ത് എത്തിയത്. ബെംഗളൂരുവിൽ നിന്ന് കൊണ്ടുവരുന്ന മയക്കുമരുന്ന് ഉൾപ്പെടെയുള്ള സിന്തറ്റിക് മരുന്നുകൾ പാക്കറ്റുകളിലാക്കി വിൽക്കുന്നതാണ് ഇയാളുടെ വിൽപ്പന രീതി. നിരവധി പേർ ഇയാളിൽ നിന്ന് മയക്കുമരുന്ന് വാങ്ങി ജില്ലയുടെ വിവിധ ഭാഗങ്ങളിൽ വിൽക്കുന്നുണ്ടെന്ന് എക്സൈസ് അറിയിച്ചു.
വാര്ത്തകളെ വാര്ത്തകളായി മാത്രം വായനക്കാരിലേക്ക് എത്തിക്കുന്ന ഒരു സ്വതന്ത്ര മാധ്യമ സംവിധാനമാണ് മലയോരം ന്യൂസ്.