കുട്ടികൾക്ക് ആമകളെ പേടിയായിരുന്നു... അവയുടെ മാംസം രുചികരമാണെന്ന് ഞങ്ങൾ അവരോട് പറഞ്ഞു - ഗാസയിൽ നിന്നുള്ള മാജിദ ഖാനന്റെ വാക്കുകളാണിത്. മാജിദ ഖാനാനും കുടുംബവും മാത്രമല്ല, ഗാസയിലെ മിക്ക ആളുകളും വിശപ്പ് കാരണം ആമയുടെ മാംസം കഴിക്കുന്നു. എട്ട് ആഴ്ചയായി തുടരുന്ന കടുത്ത ഉപരോധവും മത്സ്യത്തൊഴിലാളികൾക്ക് നേരെ വെടിയുതിർക്കുന്ന ഇസ്രായേൽ സൈന്യത്തിന്റെ ഭീകരതയും കാരണം ഗാസയിലെ ജനങ്ങൾ അതിജീവിക്കാൻ ആമയുടെ മാംസം കഴിക്കാൻ നിർബന്ധിതരാകുന്നു.
ഇസ്രായേൽ പട്ടാളക്കാർ എല്ലാ ദിവസവും മത്സ്യബന്ധനത്തിന് പോകുന്നവരെ വെടിവയ്ക്കുന്നു. അവരുടെ ഏക ഭക്ഷണ സ്രോതസ്സ് തടഞ്ഞതിനുശേഷം ഗാസയിലെ ജനങ്ങൾ ഭക്ഷണത്തിനായി കരയിലിറങ്ങുന്ന ആമകളെ ഉപയോഗിക്കാൻ തുടങ്ങിയിട്ടുണ്ടെന്ന് 'അൽ ജസീറ' റിപ്പോർട്ട് ചെയ്യുന്നു. കടലാമയെ കഴിക്കേണ്ടിവരുമെന്ന് ഒരിക്കലും കരുതിയിരുന്നില്ല, മറ്റ് മാർഗമില്ലാത്തതിനാൽ ആമകളെ മാത്രമേ കഴിക്കുന്നുള്ളൂവെന്ന് മത്സ്യത്തൊഴിലാളിയായ അബ്ദുൾ ഹലീം പറയുന്നു.
ഗാസയിലെ ഫലസ്തീനികൾക്കായുള്ള യുഎൻ അഭയാർത്ഥി ഏജൻസിയുടെ പ്രവർത്തനം തടയാൻ ഇസ്രായേലിന് അവകാശമുണ്ടെന്ന് യുഎസ് സ്റ്റേറ്റ് ഡിപ്പാർട്ട്‌മെന്റിന്റെ നിയമ ഉപദേഷ്ടാവായ ജോഷ്വ സിമ്മൺസ് ലോക കോടതിയെ അറിയിച്ചു. ഏജൻസി അടച്ചുപൂട്ടൽ ഗാസയിൽ പട്ടിണി വർദ്ധിപ്പിച്ചു. യുദ്ധസമയത്ത്, പോഷകാഹാരക്കുറവ് മൂലം ഗാസയിൽ 52 പേർക്ക് ജീവൻ നഷ്ടപ്പെട്ടു. അവരിൽ അമ്പത് പേർ കുട്ടികളായിരുന്നു.
വാര്ത്തകളെ വാര്ത്തകളായി മാത്രം വായനക്കാരിലേക്ക് എത്തിക്കുന്ന ഒരു സ്വതന്ത്ര മാധ്യമ സംവിധാനമാണ് മലയോരം ന്യൂസ്.