കളമശ്ശേരി ഗവൺമെന്റ് പോളിടെക്നിക്കിലെ കഞ്ചാവ് കേസില്‍ നാല് വിദ്യാർത്ഥികളെ പുറത്താക്കി കോളേജ്.#latestnews

 

എറണാകുളത്തെ കളമശ്ശേരി ഗവൺമെന്റ് പോളിടെക്നിക്കിലെ കഞ്ചാവ് കേസിൽ നാല് വിദ്യാർത്ഥികളെ കോളേജ് പുറത്താക്കി. പുറത്താക്കിയ വിദ്യാർത്ഥികൾക്ക് സ്വഭാവ സർട്ടിഫിക്കറ്റ് നൽകില്ല. ആഭ്യന്തര അന്വേഷണ സമിതിയുടെ റിപ്പോർട്ടിന്റെ അടിസ്ഥാനത്തിലാണ് തീരുമാനം. ആകാശ്, ആദിത്യൻ, അഭിരാജ്, അനുരാജ് എന്നീ വിദ്യാർത്ഥികളെയാണ് പുറത്താക്കിയത്.

കോടതിയുടെ അനുമതിയോടെയാണ് വിദ്യാർത്ഥികൾ പരീക്ഷ എഴുതിയത്. വിദ്യാർത്ഥികളുടെ പരീക്ഷാഫലം തടഞ്ഞുവയ്ക്കുന്നതിനെക്കുറിച്ച് ഉടൻ തീരുമാനമെടുക്കുമെന്ന് കോളേജ് അധികൃതർ വ്യക്തമാക്കി. കളമശ്ശേരി പോലീസും DANSAF ഉം ഹോസ്റ്റലിൽ നടത്തിയ പരിശോധനയിൽ കഞ്ചാവ് കണ്ടെത്തി. പരിശോധനയ്ക്കിടെ ഒരു മുറിയിൽ നിന്ന് മാത്രം 1.9 കിലോ കഞ്ചാവ് കണ്ടെത്തി. മറ്റൊരു മുറിയിൽ നിന്ന് ഒമ്പത് ഗ്രാം കഞ്ചാവും പിടിച്ചെടുത്തു.

കൊല്ലം സ്വദേശി ആകാശിന്റെ മുറിയിൽ നിന്ന് 1.9 കിലോ കഞ്ചാവ് കണ്ടെത്തി. ആലപ്പുഴ സ്വദേശി ആദിത്യന്റെയും കൊല്ലം സ്വദേശി അഭിരാജിന്റെയും മുറികളിൽ നിന്ന് ഒമ്പത് ഗ്രാം കഞ്ചാവ് പിടിച്ചെടുത്തു. കഴിഞ്ഞ മാസം 13 ന് ഹോസ്റ്റലിൽ പരിശോധന നടത്തി.