കോഴിക്കോട് : അർജുന് വിട നൽകാൻ വൻ ജനക്കൂട്ടമാണ് അർജുൻ്റെ വീട്ടിലേക്ക് ഒഴുകിയെത്തുന്നത്. രാവിലെ എട്ടരയോടെ കോഴിക്കോട് കണ്ടിക്കലിലുള്ള അർജുൻ്റെ വീട്ടിലെത്തിയ അർജുൻ്റെ ചേതനയറ്റ ശരീരം ഒരു നോക്ക് കാണാൻ ആയിരക്കണക്കിനാളുകളാണ് തടിച്ചുകൂടിയത്.
ശനിയാഴ്ച രാവിലെ ആറോടെയാണ് അർജുൻ്റെ മൃതദേഹം വഹിച്ചുള്ള ആംബുലൻസ് ജില്ലാ അതിർത്തിയായ അഴിയൂരിലെത്തിയത്. മന്ത്രി എ കെ ശശീന്ദ്രൻ, എംഎൽഎമാരായ തോട്ടത്തിൽ രവീന്ദ്രൻ, കെ കെ രമ, ജില്ലാ കലക്ടർ സ്നേഹിൽകുമാർ തുടങ്ങിയവർ മൃതദേഹം ഏറ്റുവാങ്ങി.
വീട്ടുവളപ്പിൽ പൊതുദർശനത്തിനു ശേഷം വസതിയിൽ സംസ്‌കാരം നടത്തും. മൃതദേഹം സംസ്‌കരിക്കുന്നതിനുള്ള ചെലവ് കേരള സർക്കാർ വഹിക്കും. കർണാടക സർക്കാരിൻ്റെ ദുരിതാശ്വാസ നിധിയായി അഞ്ച് ലക്ഷം രൂപ ബന്ധുക്കൾക്ക് കൈമാറും. കാർവാർ മെഡിക്കൽ കോളേജ് ആശുപത്രിയിൽ നിന്ന് മൃതദേഹം കേരള അതിർത്തിയായ മഞ്ചേശ്വരം തലപ്പാടിയിലേക്ക് കൊണ്ടുവന്ന ആംബുലൻസിനെ കർണാടക പോലീസും അനുഗമിച്ചു.
ജൂലൈ 16ന് അങ്കോളയ്ക്ക് സമീപം ശിരൂരിൽ ഉരുൾപൊട്ടലിൽ കാണാതായ അർജുൻ്റെ മൃതദേഹം 72 ദിവസങ്ങൾക്ക് ശേഷം ബുധനാഴ്ചയാണ് ഗംഗാവാലിപ്പുഴയിൽ കണ്ടെത്തിയത്. ഡിഎൻഎ പരിശോധനയ്ക്കും മറ്റു നടപടിക്രമങ്ങൾക്കുമായി കാർവാറിനെ രണ്ടുദിവസം ആശുപത്രിയിൽ കിടത്തി. ഹുബ്ബള്ളി റീജണൽ സയൻസ് ലബോറട്ടറിയിലാണ് ഡിഎൻഎ പരിശോധന നടത്തിയത്.
വാര്ത്തകളെ വാര്ത്തകളായി മാത്രം വായനക്കാരിലേക്ക് എത്തിക്കുന്ന ഒരു സ്വതന്ത്ര മാധ്യമ സംവിധാനമാണ് മലയോരം ന്യൂസ്.