സാമൂഹിക മാധ്യമങ്ങളിൽ കുട്ടികളുടെ ഉപയോഗം നിയന്ത്രിക്കാൻ കേന്ദ്രസർക്കാർ അടിയന്തരമായി ചട്ടങ്ങൾ കൊണ്ടുവരണമെന്ന് സുപ്രീം കോടതി നിർദേശിച്ചു. സർക്കാർ ഇക്കാര്യത്തിൽ ഇടപെടാൻ തയ്യാറായില്ലെങ്കിൽ, ഇൻഫർമേഷൻ ടെക്നോളജി ആക്ട് പ്രകാരം നിർദ്ദേശങ്ങൾ പുറപ്പെടുവിക്കുമെന്നും സുപ്രീം കോടതി കർശന മുന്നറിയിപ്പ് നൽകി.
'ജസ്റ്റ് റൈറ്റ്സ് ഫോർ ചിൽഡ്രൻ അലയൻസ്' നൽകിയ പൊതുതാൽപ്പര്യ ഹർജി പരിഗണിക്കുന്നതിനിടെയാണ് ചീഫ് ജസ്റ്റിസ് സൂര്യാ കാന്ത്, ജസ്റ്റിസ് ജോയ് മല്യ ബാഗ്ചി, ജസ്റ്റിസ് വി. മോഹന എന്നിവരടങ്ങിയ ബെഞ്ച് ഈ നിർദേശം മുന്നോട്ട് വെച്ചത്. കുട്ടികൾ സോഷ്യൽ മീഡിയയും മറ്റ് ഡിജിറ്റൽ പ്ലാറ്റ്ഫോമുകളും ഉപയോഗിക്കുമ്പോൾ അവരുടെ സുരക്ഷ ഉറപ്പാക്കണം എന്നതായിരുന്നു ഹർജിയുടെ പ്രധാന ആവശ്യം.
വാദത്തിനിടെ, പ്രഥമദൃഷ്ട്യാ ഈ വിഷയം ഡിജിറ്റൽ വ്യക്തിവിവര സംരക്ഷണ നിയമത്തിന്റെ പരിധിയിൽ വരുമെന്ന് സോളിസിറ്റർ ജനറൽ തുഷാർ മേത്ത ചൂണ്ടിക്കാട്ടി. എന്നാൽ ഡിപിഡിപി ആക്ട് 2027 മുതലേ നിലവിൽ വരൂ എന്നായിരുന്നു ഹർജിക്കാരുടെ വാദം. 12 മുതൽ 15 വയസ്സ് വരെ പ്രായമുള്ള കുട്ടികൾക്ക് സോഷ്യൽ മീഡിയ പ്ലാറ്റ്ഫോമുകളിൽ അക്കൗണ്ട് തുടങ്ങാൻ അനുമതി നൽകുന്നത് ഖേദകരമാണെന്ന് ജസ്റ്റിസ് ജോയ് മല്യ ബാഗ്ചി നിരീക്ഷിച്ചു. അക്കൗണ്ട് തുടങ്ങാനുള്ള കുറഞ്ഞ പ്രായം 18 ആയി ഉയർത്തണമെന്നും അദ്ദേഹം നിർദേശിച്ചു.
രാജ്യത്തെ നിയമത്തിന് അനുസൃതമായി സോഷ്യൽ മീഡിയ ഇന്റർമീഡിയറി റൂൾസ് പ്രകാരം കേന്ദ്ര സർക്കാർ ചില നിർദ്ദേശങ്ങൾ പുറപ്പെടുവിക്കണമെന്ന് സുപ്രീം കോടതി ചീഫ് ജസ്റ്റിസ് വ്യക്തമാക്കിയപ്പോൾ, സർക്കാർ അതിന് തയ്യാറാണെന്ന് സോളിസിറ്റർ ജനറൽ തുഷാർ മേത്ത കോടതിയെ അറിയിച്ചു. കുട്ടികളുടെ ഓൺലൈൻ സുരക്ഷ ഉറപ്പാക്കുന്നതിനുള്ള പുതിയ നിയമനിർമ്മാണങ്ങളിലേക്ക് ഇത് വഴി തുറക്കുമെന്നാണ് പ്രതീക്ഷ.
Hashtags: #SupremeCourt #SocialMediaControl #ChildSafety #DigitalIndia #KeralaNews #GovernmentOfIndia #OnlineSafety #ChildrenRights #JudicialDirective
വാര്ത്തകളെ വാര്ത്തകളായി മാത്രം വായനക്കാരിലേക്ക് എത്തിക്കുന്ന ഒരു സ്വതന്ത്ര മാധ്യമ സംവിധാനമാണ് മലയോരം ന്യൂസ്.