ജാഗ്രത! ഉയർന്ന കൊളസ്ട്രോൾ നിശബ്ദകൊലയാളി, ഭക്ഷണംമുതൽ ജീവിതശൈലി വരെ മാറണം... #Cholestrol

 


ന്ന് ഷു​ഗറും പ്രഷറും കൊളസ്ട്രോളുമൊക്കെ സാധാരണ രോഗങ്ങളാണ്‌. മാറിയ ഭക്ഷണരീതിയും ജീവിതശൈലിയുമൊക്കെ ഇത്തരം രോ​ഗികളുടെ നിരക്ക് വർധിപ്പിക്കുകയാണ്. ഇപ്പോഴിതാ ഉയർന്ന കൊളസ്ട്രോൾ നിയന്ത്രണവുമായി ബന്ധപ്പെട്ട് ആദ്യമായി മാർ​ഗനിർദേശങ്ങൾ പുറപ്പെടുവിച്ചിരിക്കുകയാണ് ഇന്ത്യ. ഇന്ത്യയുൾപ്പെടെയുള്ള ലോകത്തെ എല്ലാ ഹൃ​ദ്രോ​ഗവിദ​ഗ്ധരും ഇതുവരെ യൂറോപ്യൻ സൊസൈറ്റി ഓഫ് കാർഡിയോളജി പുറത്തിറക്കിയ 20-19-ലെ മാർ​ഗനിർദേശങ്ങളാണ് പിന്തുടർന്നിരുന്നത്. ഇതിനാണ് ഇപ്പോൾ മാറ്റംവന്നിരിക്കുന്നത്.

ഹൃദയാഘാതങ്ങൾ പരമാവധി തടയുക എന്നതിന്റെ ഭാ​ഗമായാണ് മാർ​ഗനിർദേശങ്ങൾ പുറത്തിറക്കിയത്. ഹൃദയാഘാതങ്ങളിലേറെയും പ്രതിരോധിക്കാവുന്നതാണ്. കാർഡിയോളജിക് സൊസൈറ്റി ഓഫ് ഇന്ത്യ(CSI) യാണ് ജൂലൈ നാലിന് ഉയർന്ന കൊളസ്ട്രോൾ നില നിയന്ത്രിക്കുന്നതു സംബന്ധിച്ച മാർ​ഗനിർദേശങ്ങൾ പുറത്തിറക്കിയിരിക്കുന്നത്.

രക്തത്തിൽ അസാധാരണമായ തോതിൽ ലിപിഡ്സ് അഥവാ കൊഴുപ്പ് കാണപ്പെടുന്ന അവസ്ഥയാണ് ഡിസ്ലിപിഡിമിയ. ഡിസ്ലിപിഡിമിയ എന്ന അവസ്ഥയിൽ എൽ.ഡി.എൽ. കൊളസ്ട്രോൾ(ചീത്ത കൊളസ്ട്രോൾ) കൂടുക, ഉയർന്ന ട്രൈ​ഗ്ലിസറൈഡ്സ്, കുറഞ്ഞ എച്ച്.ഡി.എൽ. കൊളസ്ട്രോൾ( നല്ല കൊളസ്ട്രോൾ) തുടങ്ങിയവയുമുണ്ടാകും. ലക്ഷണങ്ങൾ ഇല്ലാത്തതുകൊണ്ടുതന്നെ നിശബ്ദ കൊലയാളി എന്നാണ് ഡിസ്ലിപിഡെമിയ അറിയപ്പെടുന്നത്. കൊളസ്ട്രോൾ നില കൂടുന്നത് ഹൃദ്രോ​ഗം, പക്ഷാഘാതം തുടങ്ങി പലവിധ ആരോ​ഗ്യപ്രശ്നങ്ങൾക്കും കാരണമാകാം. ഭക്ഷണരീതി, വ്യായാമം, മരുന്ന് തുടങ്ങിയവയിലൂടെ ഇത് നിയന്ത്രിക്കണമെന്നാണ് നിർദേശത്തിൽ പറയുന്നത്.

രക്തപരിശോധനയിലൂടെയാണ് കൊളസ്ട്രോൾ നില പരിശോധിക്കുന്നത്. ഇതുവരെയുള്ള നിർദേശപ്രകാരം സാധാരണ മിനിമം കൊളസ്ട്രോൾ നില 100 mg/DL(milligrams of sugar per decilitre) ആണ് ഉണ്ടാവേണ്ടത്. എന്നാൽ ഹൃദയസംബന്ധമായ രോ​ഗങ്ങൾ കൂടുകയും കോവിഡിനുശേഷം ഹൃ​ദ്രോ​ഗികൾ കൂടുകയും ചെയ്ത പശ്ചാത്തലത്തിലാണ് രാജ്യത്തെ ഹൃദ്രോ​ഗവിദ​ഗ്ധർ വിഷയത്തിൽ മാർ​ഗനിർദേശങ്ങൾ പുറത്തിറക്കിയത്.

കാർഡിയോളജിക് സൊസൈറ്റി ഓഫ് ഇന്ത്യ നടത്തിയ പഠനപ്രകാരം രാജസ്ഥാൻ, ​ഗുജറാത്ത്, തെലങ്കാന, മണിപ്പൂർ എന്നിവയൊഴികെയുള്ള മിക്ക സംസ്ഥാനങ്ങളിലും എച്ച്.ഡി.എൽ. കൊളസ്ട്രോൾ ഏറ്റവും കുറവാണ്. ഉയർന്ന എൽ.ഡി.എൽ. കൊളസ്ട്രോൾ ഉള്ളവർ കൂടുതൽ കാണപ്പെട്ടത് കേരള, ​ഗോവ തുടങ്ങിയ സംസ്ഥാനങ്ങളിലുമാണ്.

എൽ.ഡി.എൽ. കൊളസ്ട്രോളിനെയാകണം കേന്ദ്രീകരിക്കേണ്ടത് എന്നാണ് പുതിയ മാർ​​ഗനിർദേശത്തിൽ വ്യക്തമാക്കുന്നത്. എന്നാൽ ട്രൈ​ഗ്ലിസറൈഡ്സ് ഉയർന്ന നിലയിലുള്ളവരിൽ നോൺ എച്ച്.ഡി.എല്ലിന് ആയിരിക്കണം ശ്രദ്ധകുടൂതൽ കൊടുക്കേണ്ടത്. എച്ച്.ഡി.എൽ. കൊളസ്ട്രോളും ടോട്ടൽ കൊളസ്ട്രോളും തമ്മിലുള്ള വ്യത്യാസമാണിത്.

കുടുംബത്തിൽ ആർക്കെങ്കിലും ഹൃദ്രോ​ഗസാധ്യതകൾ ഉണ്ടെങ്കിൽ പതിനെട്ടു വയസ്സിലോ അതിനുമുമ്പോ ലിപി‍ഡ് പ്രൊഫൈൽ ടെസ്റ്റ് നടത്തണമെന്നും നിർദേശത്തിലുണ്ട്. കൊളസ്‌ട്രോളിന്റെ അളവ് തിരിച്ചറിയാനായി നടത്തുന്ന രക്തപരിശോധനയാണ് ലിപിഡ് പ്രൊഫൈല്‍ പരിശോധന. ഹൃദയസംബന്ധമായ രോ​ഗങ്ങൾ ഉള്ളവരുടെ എൽ.ഡി.എൽ. നില നൂറിൽ കുറവാണെങ്കിൽ നോർമൽ ആണെന്നാണ് മുമ്പത്തെ നിർദേശത്തിലുണ്ടായിരുന്നത്. എന്നാൽ അത് തെറ്റാണ്, പുതിയ നിർദേശപ്രകാരം ഹൃദ്രോ​ഗികളിലെ എൽ.ഡി.എൽ. നില അമ്പത്തിയഞ്ചിൽ താഴെയായിരിക്കണം.

അപകടസാധ്യത കുറഞ്ഞവർ, മിതമായുള്ളവർ, ഉയർന്ന തോതിലുളളവർ, ഏറ്റവും അപകടസാധ്യതയുള്ളവർ എന്നിങ്ങനെ തിരിച്ചാണ് പുതിയ നിർദേശങ്ങൾ പുറത്തിറക്കിയത്. ഹൃ​ദയസംബന്ധമായ രോ​ഗങ്ങൾ ഉണ്ടായിട്ടില്ലാത്തവർ അപകടസാധ്യത കുറഞ്ഞവരാണ്. പുകവലിക്കുക, പുകയില ഉപയോ​ഗിക്കുക, ഹൈപ്പർടെൻഷൻ, ഡയബറ്റിസ്, ‍ഡിസ്ലിപ്ഡെമിയ, രക്തബന്ധത്തിൽ ആർക്കെങ്കിലും ചെറുപ്പക്കാരിൽ ഹൃദയാഘാതം ഉണ്ടാവുക തുടങ്ങിയ സാഹചര്യങ്ങൾ ഉള്ളവർ മിതമായ അപകടസാധ്യത ഉള്ളവരുമാണ്.

ഡയബറ്റിസ്, ഹൈപ്പർടെൻഷൻ, ​ഗുരുതരമായ വൃക്കരോ​ഗങ്ങൾ, രക്തബന്ധത്തിൽ ആർക്കെങ്കിലും ഹൃദ്രോ​ഗങ്ങൾ തുടങ്ങിയവ ഉള്ളവരാണ് ഉയർന്ന അപകടസാധ്യതാ വിഭാ​ഗത്തിലുള്ളത്. രക്തധമനികളിൽ ബ്ലോക്ക്, ഇരുപതിലേറെ വർഷമായി പ്രമേഹം, രക്തബന്ധത്തിൽ ആർക്കെങ്കിലും രക്തധമനികളിൽ തടസ്സമുണ്ടാവുക തുടങ്ങിയവരാണ് ഹൈ റിസ്ക് വിഭാ​ഗത്തിലുള്ളത്.

ഇതുവരെ ലിപി‍ഡ് പാരാമീറ്റർ പരിശോധനയിൽ എൽ.ഡി.എൽ.കൊളസ്ട്രോൾ, നോൺ എച്ച്.ഡി.എൽ. കൊളസ്ട്രോൾ, എച്ച്.ഡി.എൽ. കൊളസ്ട്രോൾ, ട്രൈ​ഗ്ലിസറൈഡ്സ് തുടങ്ങിയവയായിരുന്നു പ്രധാന ഘടകങ്ങൾ. എന്നാൽ ഇനിമുതൽ ലിപോപ്രോട്ടിൻ(a) കൂടി പരിശോധിക്കണം. ലിപോപ്രോട്ടീന്റെ അളവ് കൂടുതലാണെങ്കിൽ ഹൃദ്രോ​ഗത്തിനും പക്ഷാഘാതത്തിനുമുള്ള സാധ്യത കൂടുതലാണെന്നാണ് മനസ്സിലാക്കേണ്ടത്.

ഡിസ്ലിപിഡിമിയ നിയന്ത്രിക്കാൻ ജീവിതശൈലിയിൽ മാറ്റംവരുത്തേണ്ടത് പ്രധാനമാണെന്ന് മാർ​ഗനിർദേശത്തിൽ പറയുന്നു. പഞ്ചസാര, കാർബോഹൈഡ്രേറ്റ് തുടങ്ങിയവ കുറയ്ക്കേണ്ടത് പ്രധാനമാണ്, അല്ലാത്തപക്ഷം കൊഴുപ്പ് അടിഞ്ഞുകൂടി ബ്ലോക്ക് ഉണ്ടാകാനുള്ള സാധ്യത കൂടുതലാണ്. വ്യായാമവും യോ​ഗയും ശീലമാക്കേണ്ടത് പ്രധാനമാണെന്നും പറയുന്നുണ്ട്.

MALAYORAM NEWS is licensed under CC BY 4.0