മലപ്പുറം : വളർത്തു മത്സ്യം ചത്തതിനെ തുടർന്ന് മലപ്പുറത്ത് വിദ്യാർത്ഥി തൂങ്ങിമരിച്ചു. വളാഞ്ചേരി കളത്തിൽ ചങ്ങരംകുളം പൊലീസ് സ്റ്റേഷനു സമീപം താമസിക്കുന്ന റോഷൻ ആർ. മേനോൻ (13) ആണ് മരിച്ചത്. റോഷനെ വീടിന്റെ ടെറസിൽ തൂങ്ങിമരിച്ച നിലയിലാണ് കണ്ടെത്തിയത്. ഉടൻ ആശുപത്രിയിൽ എത്തിച്ചെങ്കിലും ജീവൻ രക്ഷിക്കാനായില്ല.
വെള്ളിയാഴ്ച രാവിലെ ഏഴരയോടെ പ്രാവുകൾക്ക് തീറ്റ കൊടുക്കാൻ റോഷൻ വീടിന്റെ ടെറസിലേക്ക് പോയിരുന്നു. ഏറെ നേരം കഴിഞ്ഞിട്ടും തിരിച്ചെത്താത്തതിനെ തുടർന്ന് വീട്ടുകാർ എത്തി നോക്കിയപ്പോഴാണ് തൂങ്ങിമരിച്ച നിലയിൽ കണ്ടത്. ടെറസിന് മുകളിലുള്ള ഷെഡിൽ പ്ലാസ്റ്റിക് കയർ ഉപയോഗിച്ച് ഇരുമ്പ് പൈപ്പിൽ തൂങ്ങിക്കിടക്കുകയായിരുന്നു. ബന്ധുക്കൾ ചങ്ങരംകുളത്തെ സ്വകാര്യ ആശുപത്രിയിൽ എത്തിച്ചെങ്കിലും മരിച്ചു.
റോഷന്റെ അക്വേറിയത്തിൽ സൂക്ഷിച്ചിരുന്ന മത്സ്യം കഴിഞ്ഞ ദിവസം ചത്തിരുന്നു. റോഷൻ മാനസിക വിഷമത്തിലായിരുന്നുവെന്ന് ബന്ധുക്കൾ പറഞ്ഞു. മൂക്കുതല സർക്കാർ ഹയർസെക്കൻഡറി സ്കൂളിലെ എട്ടാം ക്ലാസ് വിദ്യാർഥിയാണ് റോഷൻ. ചങ്ങരംകുളം സൺറൈസ് ആശുപത്രി മോർച്ചറിയിൽ സൂക്ഷിച്ചിരിക്കുന്ന മൃതദേഹം പോലീസ് നടപടികൾക്കും പോസ്റ്റ്മോർട്ടത്തിനും ശേഷം ബന്ധുക്കൾക്ക് വിട്ടുനൽകും.