Vizhinjam Port എന്ന ലേബല്‍ ഉള്ള പോസ്റ്റുകള്‍ കാണിക്കുന്നു. എല്ലാ പോസ്റ്റുകളും കാണിക്കൂ
Vizhinjam Port എന്ന ലേബല്‍ ഉള്ള പോസ്റ്റുകള്‍ കാണിക്കുന്നു. എല്ലാ പോസ്റ്റുകളും കാണിക്കൂ

വിഴിഞ്ഞം തുറമുഖത്ത് ജോലി ഒഴിവുകള്‍ ചെയ്യേണ്ടത് ഇത്രമാത്രം, ഓൺലൈനായി അപേക്ഷകൾ സമർപ്പിക്കാം. #Job_Opportunites


 വിഴിഞ്ഞം തുറമുഖത്ത് ജോലി ഒഴിവ്. നിലവിൽ രണ്ട് തസ്തികകളിലേക്കാണ് അപേക്ഷ ക്ഷണിച്ചിരിക്കുന്നത്. മൾട്ടി ടാസ്കിംഗ് പേഴ്‌സണൽ, അക്കൗണ്ട്സ് ക്ലർക്ക് തസ്തികകളിലേക്ക് അപേക്ഷ ക്ഷണിച്ചു. ഫെബ്രുവരി 18 (വൈകുന്നേരം 5:00) വരെ ഓൺലൈനായി അപേക്ഷ സമർപ്പിക്കാം.

മൾട്ടി ടാസ്കിംഗ് പേഴ്‌സണൽ തസ്തികയിലേക്ക് 2 ഒഴിവുകളുണ്ട്. ബിരുദവും കമ്പ്യൂട്ടർ പ്രാവീണ്യവും (മലയാളം, ഇംഗ്ലീഷ് ടൈപ്പിംഗ്). സർക്കാർ/അർദ്ധസർക്കാർ/അംഗീകൃത സ്വകാര്യ സ്ഥാപനങ്ങളിൽ ഓഫീസ്/അഡ്മിനിസ്ട്രേഷൻ/ക്ലറിക്കൽ ജോലിയിൽ കുറഞ്ഞത് ഒരു വർഷത്തെ പ്രവൃത്തിപരിചയം ആവശ്യമാണ്. പ്രായപരിധി 36 വയസ്സാണ്, യൂണിഫോം ശമ്പളം 21,175 രൂപയുമാണ്.

അക്കൗണ്ട്സ് ക്ലർക്ക് തസ്തികയിലേക്ക് 1 ഒഴിവുണ്ട്. ടാലിയിൽ പ്രാവീണ്യമുള്ള ബി.കോം ബിരുദം ആവശ്യമാണ്. സർക്കാർ/അർദ്ധസർക്കാർ/അംഗീകൃത സ്വകാര്യ സ്ഥാപനങ്ങളിൽ അക്കൗണ്ട്സ് വകുപ്പിൽ കുറഞ്ഞത് രണ്ട് വർഷത്തെ പ്രവൃത്തിപരിചയം ആവശ്യമാണ്. പ്രായപരിധി 36 വയസ്സാണ്. യൂണിഫോം ശമ്പളം 21,175 രൂപ.

തിരഞ്ഞെടുക്കപ്പെടുന്ന ഉദ്യോഗാർത്ഥികളെ ഒരു വർഷത്തേക്ക് സിഎംഡി വഴി ഔട്ട്‌സോഴ്‌സിംഗ് അടിസ്ഥാനത്തിൽ വിഐഎസ്എല്ലിലേക്ക് നിയമിക്കും. ഉദ്യോഗാർത്ഥികൾക്ക് സെന്റർ ഫോർ മാനേജ്‌മെന്റ് ഡെവലപ്‌മെന്റിന്റെ വെബ്‌സൈറ്റ് (www.cmd.kerala.gov.in) വഴി ഓൺലൈനായി അപേക്ഷിക്കാം.

 Job opportunities await you in Vizhinjam; all you have to do is submit applications online.

വിഴിഞ്ഞം ആദ്യ കണ്ടെയ്നർ ഷിപ്പ് ബെർത്ത് ചെയ്തതിട്ട് ഇന്നേക്ക് ഒരു വർഷം #vizhinjam

 



തിരുവനന്തപുരം:
  വിഴിഞ്ഞം തുറമുഖത്ത് ആദ്യ കണ്ടെയ്നർ കപ്പൽ ബെർത്ത് ചെയ്തിട്ട് ഇന്നേക്ക് ഒരു വർഷം. 2024 ജൂലൈ 11ന് ആണ് സാൻ ഫെർണാണ്ടോ എന്ന കപ്പൽ കണ്ടെയ്നറുകളുമായി വിഴിഞ്ഞത്ത് അടുത്തത്. 2024 ഡിസംബറിൽ കൊമേഴ്സ്യൽ ഓപ്പറേഷൻ ആരംഭിച്ചു. ലോകത്തെ തന്നെ വിസ്മയിപ്പിക്കുന്ന കുതിപ്പാണ് ഈ കാലയളവിൽ വിഴിഞ്ഞം നടത്തിയതെന്ന് മന്ത്രി വി എൻ വാസവൻ ഫേസ്ബുക്കിൽ കുറിച്ചു. ലോകത്തിലെ ഏറ്റവും വലിയ കണ്ടെയ്നർ കപ്പൽ എന്ന് വിശേഷിപ്പിക്കപ്പെടുന്ന എം എസ് സി ഐറിന ഉൾപ്പെടെ കഴിഞ്ഞ ഒരു വർഷത്തിനിടെ 392 കപ്പലുകൾ വിഴിഞ്ഞത്ത് എത്തിയതായും മന്ത്രി പറഞ്ഞു.

വാണിജ്യാടിസ്ഥാനത്തിൽ പ്രവർത്തനം തുടങ്ങി ആദ്യ മാസങ്ങളിൽ തന്നെ പൂർണ ശേഷിയിൽ പ്രവർത്തനം നടത്തിയ ലോകത്തെ അപൂർവം പോർട്ടുകളിലൊന്നായി വിഴിഞ്ഞം മാറിയതായും അദ്ദേഹം കുറിച്ചു. വിഴിഞ്ഞം പ്രദേശത്തെ വനിതകളെ പരിശീലിപ്പിച്ചു ഇന്ത്യയിലെ ആദ്യ വനിതാ ഓട്ടമേറ്റഡ് ക്രെയിൻ ഓപ്പറേറ്റർമാരാക്കിയത് രാജ്യാന്തര തലത്തിൽ വരെ ശ്രദ്ധ നേടിയ കാര്യവും മന്ത്രി പങ്കുവച്ചു. ഒന്നാം വർഷം അഭിമാനത്തോടെ ആഘോഷിക്കുന്നതിനൊപ്പം ഏതാണ്ട് 10000 കോടിയിലേറെ ചെലവ് പ്രതീക്ഷിക്കുന്ന രണ്ടാം ഘട്ട നിർമാണപ്രവർത്തനങ്ങളും ഉടൻ തുടങ്ങുമെന്നും മന്ത്രി കൂട്ടിച്ചേർത്തു.

വിഴിഞ്ഞം തുറമുഖോദ്ഘാടനം: പ്രധാനമന്ത്രിയുടെ അധ്യക്ഷതയിൽ സമുദ്രവുമായി പുതിയ ബന്ധം.#vizhinjamport

 


വിഴിഞ്ഞം അന്താരാഷ്ട്ര തുറമുഖം ഇന്ന് പ്രധാനമന്ത്രി രാഷ്ട്രത്തിന് സമർപ്പിക്കും. വിഴിഞ്ഞം തുറമുഖത്ത് ഒരുക്കിയിരിക്കുന്ന പ്രൗഢഗംഭീരമായ വേദിയിലാണ് കമ്മീഷൻ ചടങ്ങ് നടക്കുക. ചടങ്ങിൽ പങ്കെടുക്കാൻ എത്തിയ പ്രധാനമന്ത്രി രാജ്ഭവനിൽ തങ്ങുന്നു. രാവിലെ 10.15 ന് രാജ്ഭവനിൽ നിന്ന് പ്രധാനമന്ത്രി പുറപ്പെടും. പാങ്ങോട് സൈനിക ക്യാമ്പിൽ എത്തുന്ന പ്രധാനമന്ത്രി 10.25 ന് ഹെലികോപ്റ്ററിൽ വിഴിഞ്ഞത്തേക്ക് പോകും.

രാവിലെ 10.40 മുതൽ 20 മിനിറ്റ് അദ്ദേഹം തുറമുഖ ഓപ്പറേഷൻ സെന്റർ സന്ദർശിക്കും. രാവിലെ 11:00 ന് ആരംഭിക്കുന്ന ചടങ്ങ് കൃത്യം ഒന്നര മണിക്കൂറിനുള്ളിൽ പൂർത്തിയാകും. മുഖ്യമന്ത്രി പിണറായി വിജയൻ, കേന്ദ്രമന്ത്രിമാരായ സുരേഷ് ഗോപി, ജോർജ് കുര്യൻ, തലസ്ഥാനത്തെ മന്ത്രിമാരായ ഡോ. ശശി തരൂർ എംപി, അടൂർ പ്രകാശ് എംപി, എ.എ. റഹീം എംപി, എം. വിൻസെന്റ് എംഎൽഎ, ബിജെപി സംസ്ഥാന പ്രസിഡന്റ് രാജീവ് ചന്ദ്രശേഖർ തുടങ്ങിയവർ വേദിയിൽ ഇടം നേടും.

ക്ഷണിച്ചിട്ടുണ്ടെങ്കിലും പ്രതിപക്ഷ നേതാവ് വി.ഡി. സതീശൻ ചടങ്ങിൽ പങ്കെടുക്കില്ല. കമ്മീഷൻ ചെയ്യുന്ന ചടങ്ങിന് സാക്ഷ്യം വഹിക്കാൻ 10,000 പേർ എത്തുമെന്നാണ് കണക്കാക്കുന്നത്. തമ്പാനൂരിൽ നിന്നും കിഴക്കേക്കോട്ടയിൽ നിന്നും വിഴിഞ്ഞത്തേക്ക് കെ.എസ്.ആർ.ടി.സി പ്രത്യേക സർവീസുകൾ നടത്തും. രാവിലെ 7 മുതൽ 9.30 വരെ മുള്ളൂരിലെ തുറമുഖ ഗേറ്റിന് സമീപമുള്ള റോഡിലൂടെ പൊതുജനങ്ങൾക്ക് പ്രവേശനം അനുവദിക്കും. തിരിച്ചറിയൽ കാർഡുകൾ കൈവശം വയ്ക്കണം. പ്രധാനമന്ത്രിയുടെയും മുഖ്യമന്ത്രിയുടെയും വാഹനവ്യൂഹം മാത്രമേ പ്രധാന ഗേറ്റിലൂടെ പ്രവേശിക്കാൻ അനുവദിക്കൂ. വിഴിഞ്ഞത്തും പരിസരത്തും പാർക്കിംഗ് നിയന്ത്രണങ്ങൾ ഏർപ്പെടുത്തിയിട്ടുണ്ട്. ലോകത്തിലെ ഏറ്റവും വലിയ കപ്പലുകളിൽ ഒന്നായ കൂറ്റൻ മദർഷിപ്പ് എം.എസ്.സി സെലെസ്റ്റിനോ മെറിക്ക കമ്മീഷൻ ചെയ്യുന്ന ദിവസം വിഴിഞ്ഞത്ത് എത്തുന്നു.

വിഴിഞ്ഞം തുറമുഖത്തിന്‍റെ ട്രയൽ റൺ ഇന്ന്; മുഖ്യമന്ത്രി കപ്പലിനെ സ്വീകരിക്കും... #Vizhinjam_Port

 


വിഴിഞ്ഞം അന്താരാഷ്ട്ര തുറമുഖത്തെത്തിയ ആദ്യ ചരക്ക് കപ്പലിന്റെ ട്രയൽ റൺ ഇന്ന് മുഖ്യമന്ത്രി പിണറായി വിജയൻ ഉദ്ഘാടനം ചെയ്യും. രാഷ്ട്രീയ വിവാദങ്ങളോടെയാണ് കേരളത്തിൻ്റെ അഭിമാന പദ്ധതിയുടെ കപ്പലോടി തുടങ്ങുന്നത്. പദ്ധതിയുടെ പിതൃത്വത്തിൽ തുടങ്ങി പ്രതിപക്ഷ നേതാക്കളെ ക്ഷണിച്ചില്ല എന്നത് വരെ നീളുന്നുണ്ട് വിവാദങ്ങൾ.

വിഴിഞ്ഞം അന്താരാഷ്ട്ര തുറമുഖത്തെത്തിയ ആദ്യ ചരക്കുകപ്പൽ സാൻ ഫെർണാണ്ടോക്ക് സ്വീകരണവും ട്രയൽ റണ്ണിന്റെ ഉദ്ഘാടനവും നടക്കുന്നത് ഇന്ന് രാവിലെ 10 മണിക്കാണ് . മുഖ്യമന്ത്രിക്കൊപ്പം മന്ത്രിമാരും എംഎൽഎമാരും ചടങ്ങിന് എത്തും. പ്രതിപക്ഷ നേതാവിന് ക്ഷണമില്ലാത്തത് ഇതിനോടകം വിവാദമായിട്ടുണ്ട്. പദ്ധതിയുടെ ക്രെഡിറ്റ് കൈവിട്ടുപോകുമെന്ന ഭയമാണ് സർക്കാരിനെന്നാണ് പ്രതിപക്ഷ നേതാക്കളുടെ വാദം. സ്ഥലത്തെ എം.പിയായ ശശി തരൂരും ചടങ്ങ് ബഹിഷ്കരിക്കുമെന്ന് അറിയിച്ചിട്ടുണ്ട്. വിഴിഞ്ഞം പദ്ധതിക്ക് പൂർണ്ണ പിന്തുണയെങ്കിലും മത്സ്യത്തൊഴിലാളികളോട് നൽകിയ വാഗ്ദാനങ്ങൾ പാലിക്കാത്തതിൽ പ്രതിഷേധിച്ചാണ് ബഹിഷ്കരണം എന്നാണ് അറിയിപ്പ്.

വിഴിഞ്ഞം പദ്ധതിയുടെ പിതൃത്വം ആണ് പ്രധാന രാഷ്ട്രീയ ചർച്ച. എൽഡിഎഫ് സർക്കാരിന്റെ ഇച്ഛാശക്തി എന്ന് ഇടതു കേന്ദ്രങ്ങളുടെ അവകാശവാദം. എന്നാൽ ഉമ്മൻചാണ്ടിയുടെ ദീർഘവീക്ഷണമെന്നാണ് കോൺഗ്രസ് ക്യാമ്പിന്റെ പ്രതിരോധം. തുറമുഖത്തിന് ഉമ്മൻചാണ്ടിയുടെ പേര് നൽകണമെന്ന ആവശ്യവും കോൺഗ്രസ് മുന്നോട്ടു വച്ചിട്ടുണ്ട്. ഇടതു സർക്കാർ ഭരണ നേട്ടമായി ഉയർത്തിക്കാട്ടുന്ന വിഴിഞ്ഞം തുറമുഖത്തെ, ഉമ്മൻചാണ്ടിയുടെ കുഞ്ഞ് എന്ന വൈകാരികതിയിൽ മറു പ്രതിരോധം തീർക്കുകയാണ് യുഡിഎഫ്. യുഡിഎഫ് എം.എൽ.എ എം. വിൻസെൻ്റ് ഉദ്ഘാടന ചടങ്ങിൽ പങ്കെടുത്തേക്കും. വിഴിഞ്ഞത്ത് കപ്പലിനെ സ്വീകരിക്കുന്ന ഇന്ന് ആഹ്ലാദ ദിനമായി ആചരിച്ച് എല്ലാ ജില്ലാ കേന്ദ്രങ്ങളിലും ഉമ്മൻചാണ്ടിക്ക് അഭിവാദ്യപ്രകടനം നടത്താൻ യുഡിഎഫ് പ്രവർത്തകരോട് നിർദേശിച്ചിട്ടുണ്ട്.

ആഹ്ലാദത്തിന്റെയും അഭിമാനത്തിന്റെയും നിമിഷം;ലോകം കേരളത്തെ ഉറ്റു നോക്കുന്നു'; മന്ത്രി വിഎൻ വാസവൻ... #Kerala _News

വിഴിഞ്ഞം തുറമുഖത്ത് ആദ്യ മദർഷിപ്പ് എത്തുമ്പോൾ കേരളത്തെ സംബന്ധിച്ച് ആഹ്ലാദത്തിന്റെയും അഭിമാനത്തിന്റെയും നിമിഷമെന്ന് തുറമുഖ മന്ത്രി വിഎൻ വാസവൻ. ലോകം കേരളത്തെ ഉറ്റുനോക്കുകയാണെന്നും ചരിത്രനിമിഷമാണെന്നും മന്ത്രി ട്വന്റിഫോറിനോട് പറഞ്ഞു. കേരളത്തിന്റെ വികസനരംഗത്ത് വിസ്മയങ്ങൾ തീർക്കുന്ന പ്രവർത്തനങ്ങളുമായി മുന്നോട്ടുപോകുന്ന പിണറായി സർക്കാരിന്റെ തൊപ്പിയിലെ ഒരു പൊൻതൂവലാണ് ഇപ്പോൾ യാഥാർത്ഥ്യമാകുന്നതെന്ന് മന്ത്രി വിഎൻ വാസവൻ പറഞ്ഞു.

ആരുടെയും കണ്ണീര് വീഴ്ത്താതെ എല്ലാവരുടെയും പ്രശ്‌നങ്ങൾ പരിഹാരം കണ്ടുകൊണ്ടാണ് പോർട്ട് കമ്മീഷൻ ചെയ്യാൻ പോകുന്നതെന്ന് മന്ത്രി പറഞ്ഞു. 106.8 കോടി രൂപ പ്രദേശത്ത് സ്ഥലം വിട്ടു നൽകിയവർക്കും, ജോലി നഷ്ടമായവർക്കും, വിവിധ തരത്തിൽ പ്രയാസം ഉണ്ടായവർക്കും വിതരണം ചെയ്തുകഴിഞ്ഞതായി മന്ത്രി അറിയിച്ചു. കൂടാതെ ഉയർന്നുവന്ന പ്രാദേശിക പ്രശ്‌നങ്ങൾ ചർച്ചകളിലൂടെ പരിഹാരമുണ്ടാകുന്ന രീതിയിലേക്ക് എത്തിയതായി മന്ത്രി പറഞ്ഞു. കേരളത്തിന് സാമ്പത്തികപരമായും, വ്യവസായികപരമായും, വാണിജ്യപരമായും, ടൂറിസപരമായും, തൊഴിൽപരമായി വികസനത്തിന്റെ കുതിപ്പ് ഉണ്ടാക്കാൻ വിഴിഞ്ഞം വഴി കഴിയുമെന്ന് മന്ത്രി പറഞ്ഞു.
മറ്റൊരു തുറമുഖത്തിന് ലഭിക്കാത്ത പ്രകൃതിയുടെ വരദാനമാണ് വിഴിഞ്ഞം തുറമുഖം എന്ന് മന്ത്രി പറഞ്ഞു. ഏറ്റവും ശ്രദ്ധേയമായ തുറമുഖമായി വിഴിഞ്ഞം മാറുന്നു. ആദ്യം ഘട്ടം തീരുമ്പോൾ തന്നെ പ്രതിവർഷം 10 ലക്ഷം കണ്ടെയ്‌നറുകൾ കയറ്റിയിറക്കാനുള്ള സാധ്യതകളുണ്ടാവുകയാണെന്ന് മന്ത്രി പറഞ്ഞു. ഭാവിയിൽ വിഴിഞ്ഞം എല്ലാ ഘട്ടത്തിലും വിവിധ തരത്തിൽ പ്രയോജനപ്പെടുത്താൻ കഴിയുന്ന തരത്തിൽ വിഴിഞ്ഞം മാറും. ഒന്നാം ഘട്ടം കഴിഞ്ഞു. അടുത്ത ഘട്ടം ആരംഭിക്കുന്നതിനുള്ള നടപടികൾ ആംരഭിച്ചുകഴിഞ്ഞിട്ടുണ്ട്. എല്ലാ വിഭാഗം ആളുകളെയും കൂട്ടി യോജിപ്പിച്ചുകൊണ്ടാണ് വിഴിഞ്ഞത്തെ വികസന വിഷയങ്ങൾ മുന്നോട്ടു കൊണ്ടുപോകുന്നതെന്ന് മന്ത്രി വിഎൻ വാസവൻ പറഞ്ഞു.

'ഉമ്മൻചാണ്ടി സർക്കാരിന്റെ കാലത്തല്ല വിഴിഞ്ഞം പദ്ധതി തുടങ്ങിയത്, ആദ്യം കമ്മിറ്റിയെ നിയോഗിച്ചത് ഇ.കെ നായനാർ സർക്കാർ'... #Kerala_News

 


ഉമ്മൻചാണ്ടി സർക്കാരിന്റെ കാലത്താണ് വിഴിഞ്ഞം പദ്ധതി തുടങ്ങിയത് എന്നുള്ള വാദം തെറ്റാണെന്ന് മന്ത്രി വി എൻ വാസവൻ. ഇ കെ നായനാർ സർക്കാരാണ് ആദ്യമായി വിഴിഞ്ഞം പദ്ധതിക്കായി കമ്മറ്റിയെ നിയോഗിച്ചതെന്നും ഇതനുസരിച്ച് കുമാർ കമ്മിറ്റിയാണ് ആദ്യമായി പഠനം നടത്തിയതെന്നും അദ്ദേഹം പറഞ്ഞു. പിന്നീട് വന്ന എ കെ ആന്റണി സർക്കാർ ടെൻഡർ കൊടുത്തില്ലെന്നും
വിഎസ് അച്യുതാനന്ദൻ സർക്കാരാണ് ടെൻഡർ കൊടുത്തതെന്നും മന്ത്രി വ്യക്തമാക്കി. മാത്രമല്ല വിഴിഞ്ഞം പദ്ധതിയുടെ നിർമ്മാണ പ്രവർത്തനങ്ങൾ പൂർണ്ണമായി നിർവഹിച്ചത് പിണറായി സർക്കാരാണെന്നും അദ്ദേഹ വിശദീകരിച്ചു.

അതേസമയം കാത്തിരിപ്പിന് വിരാമമിട്ട് വിഴിഞ്ഞം അന്താരാഷ്ട്ര തുറമുഖത്ത് നാളെ കൂറ്റൻ മദർഷിപ് അടുക്കും. ഡാനിഷ് ചരക്ക് കപ്പലായ സാൻ ഫെർണാണ്ടോ രാവിലെ ആറുമണിയോടെ ബർത്തിൽ അടുക്കും. കപ്പൽ ഇന്ന് അർധരാത്രി തന്നെ പുറംകടലിൽ എത്തും. വെള്ളിയാഴ്ച മുഖ്യമന്ത്രിയുടെ നേതൃത്വത്തിലാണ് കപ്പലിന് സ്വീകരണം.

ചരക്കുനിറച്ച 2000 കണ്ടൈനറുകളുമായാണ് മെർസ്‌കിന്റെ സാൻ ഫെർണാണ്ടോ എന്ന കപ്പൽ അടുക്കുന്നത്. ഇന്ന് പുറംകടലിൽ എത്തുമെങ്കിലും ബർത്തിൽ അടുക്കാൻ നാളെ രാവിലെ ആറുമണിയാകും. ഒരു ദിവസം കപ്പലിന് വിശ്രമം. വെള്ളിയാഴ്ച രാവിലെ 10 മണിക്ക് മദർഷിപ്പിന് വൻ സ്വീകരണം. ടഗ് ബോട്ടുകൾ വാട്ടർ സല്യൂട്ട് നൽകും. മുഖ്യമന്ത്രിയും, കേന്ദ്ര തുറമുഖ മന്ത്രിയും അദാനി പോർട്ട് അധികൃതരും, വിസിൽ അധികൃതരും ചേർന്ന് കപ്പലിനെ സ്വാഗതം ചെയ്യും. ട്രയൽ റണ്ണിന്റെ ഉദ്‌ഘാടനം മുഖ്യമന്ത്രി പിണറായി വിജയൻ നിർവഹിക്കും.

തിരുവനന്തപുരം ജില്ലയിലെ എംപിമാരും എംഎൽഎമാരും ചടങ്ങിൽ പങ്കെടുക്കും. കപ്പലിലുള്ള മുഴുവൻ ചരക്കും തുറമുഖത്ത് ഇറക്കി അന്നുതന്നെ സാൻ ഫെർണാണ്ടോ മടങ്ങും. തൊട്ട് പിന്നാലെ രണ്ട് ഫീഡർ കപ്പലുകൾ എത്തി ചരക്കുകൾ മറ്റ് തുറമുഖങ്ങളിലേക്ക് കൊണ്ടുപോകും. സെപ്റ്റംബർ വരെ നിരവധി മദർഷിപ്പുകളും, ഫീഡർഷിപ്പുകളും ചരക്കുനീക്കത്തിന് വിഴിഞ്ഞത്ത് എത്തും.

ഏറ്റവും പുതിയ വാര്‍ത്തകള്‍, ജോലി ഒഴിവുകള്‍, ഷോപ്പിംഗ്‌ ഓഫറുകള്‍ എന്നിവ അറിയുവാന്‍ വാട്ട്സ്ആപ്പ് ഗ്രൂപ്പില്‍ ജോയിന്‍ ചെയ്യുക 👉🏽 JOIN WHATSAPP
MALAYORAM NEWS is licensed under CC BY 4.0