ഇറാനിൽ വീണ്ടും യുഎസ് മിസൈൽ ആക്രമണം; നാല് മരണം, ശക്തമായ തിരിച്ചടിക്ക് ഒരുങ്ങി ഇറാൻ #IranAttack

ഇറാനിൽ വീണ്ടും മിസൈൽ ആക്രമണം നടത്തി അമേരിക്ക. ഇന്നലെ രാത്രി ഇറാനിലെ തുറമുഖ നഗരങ്ങളെ ലക്ഷ്യമിട്ട് യുഎസ് നടത്തിയ മിസൈൽ ആക്രമണത്തിൽ നാലുപേർ കൊല്ലപ്പെട്ടതായി ഇറാൻ സ്ഥിരീകരിച്ചു. ബന്ദർ അബ്ബാസ്, സിറിക്, കൊനാറക് തുടങ്ങിയ മേഖലകളിലാണ് സ്ഫോടനങ്ങളുണ്ടായത്. ചബഹാറിലും കൊനാറാക്കിലും നാല് മിസൈലുകൾ പതിച്ചതായും റിപ്പോർട്ടുകളുണ്ട്. ആക്രമണത്തിന് പിന്നാലെ ശക്തമായ തിരിച്ചടി നൽകുമെന്ന് ഇറാൻ മുന്നറിയിപ്പ് നൽകിയിട്ടുണ്ട്. പശ്ചിമേഷ്യയിലുള്ള തങ്ങളുടെ പൗരന്മാർക്ക് അമേരിക്കയും മുന്നറിയിപ്പ് നൽകി.

കഴിഞ്ഞ ദിവസം ഹോർമുസ് കടലിടുക്കിന് സമീപത്തെ ലറാക്ക് ദ്വീപീലേക്ക് യുഎസ് നടത്തിയ വ്യോമാക്രമണത്തിൽ ഒരു സൈനികൻ ഉൾപ്പെടെ മൂന്നുപേർ കൊല്ലപ്പെട്ടിരുന്നു. ഇതിന് മറുപടിയായി യുഎഇയിലെയും ജോർദാനിലെയും യുഎസ് സൈനിക താവളങ്ങൾ ലക്ഷ്യമിട്ട് ഇറാൻ പ്രത്യാക്രമണം നടത്തി. യുഎഇയിലെ അൽ മിൻഹാദ് വ്യോമതാവളത്തിലേക്ക് എത്തിയ ഇറാനിയൻ ഡ്രോണുകൾ വെടിവെച്ചിട്ടതോടെയാണ് സംഘർഷം പുതിയ തലത്തിലെത്തിയത്. ഈ പ്രത്യാക്രമണത്തിനുള്ള മറുപടിയായാണ് ഇപ്പോൾ അമേരിക്ക വീണ്ടും പോർമുഖം തുറന്നിരിക്കുന്നത്.

അതേസമയം, യുഎസിനുമേൽ സാമ്പത്തിക സമ്മർദം ചെലുത്തുന്നതിനായി എല്ലാ എണ്ണ കയറ്റുമതി രാജ്യങ്ങളെയും ലക്ഷ്യം വെക്കണമെന്ന് ഇറാൻ ഡെപ്യൂട്ടി പാർലമെന്റ് സ്പീക്കർ ഹമീദ്രേസ ഹാജി ബാബേയ് ആവശ്യപ്പെട്ടു. പശ്ചിമേഷ്യയിൽ അമേരിക്കയുടെ സാമ്പത്തിക താത്പര്യങ്ങളെ പ്രതിരോധിക്കാൻ ഇത് അത്യാവശ്യമാണെന്നും അദ്ദേഹം കൂട്ടിച്ചേർത്തു.

എന്നാൽ ചർച്ചകൾക്കായി ഇറാനെ എത്തിക്കുന്നതിന് വേണ്ടിയാണ് ഇറാനുമേൽ യുഎസ് സാമ്പത്തിക ഉപരോധം ഏർപ്പെടുത്തിയതെന്നാണ് യുഎസ് ട്രഷറി സെക്രട്ടറി സ്കോട്ട് ബെസന്റിന്റെ വാദം. മേഖലയിൽ സമാധാനം പുനഃസ്ഥാപിക്കാൻ ഇത് അനിവാര്യമാണെന്നും അദ്ദേഹം അഭിപ്രായപ്പെട്ടു. ഇരു രാജ്യങ്ങളും തമ്മിലുള്ള സംഘർഷം കൂടുതൽ സങ്കീർണ്ണമാകാൻ സാധ്യതയുണ്ടെന്നാണ് അന്താരാഷ്ട്ര നിരീക്ഷകരുടെ വിലയിരുത്തൽ.

Hashtags: #Iran #US #MiddleEast #Conflict #MissileAttack #Geopolitics #WorldNews

അയത്തുള്ള ഖമനേയിയുടെ ശവസംസ്കാരം വീണ്ടും മാറ്റിവച്ചു; കാരണം അവ്യക്തം #ayatollah-khamenei-funeral-postponed-iran

ഇറാനിലെ പരമോന്നത നേതാവ് ആയത്തുള്ള ഖമനേയിയുടെ ശവസംസ്കാര ചടങ്ങുകൾ വീണ്ടും മാറ്റിവച്ചതായി അന്താരാഷ്ട്ര മാധ്യമങ്ങൾ റിപ്പോർട്ട് ചെയ്യുന്നു. ടെഹ്‌റാനിൽ നടക്കാനിരുന്ന ചടങ്ങുകളാണ് അപ്രതീക്ഷിതമായി നീട്ടിവെച്ചിരിക്കുന്നത്. ലോകമെമ്പാടുമുള്ള നിരീക്ഷകർ ഈ വിഷയത്തിൽ ഇറാനിൽ നിന്നുള്ള കൂടുതൽ വിവരങ്ങൾക്കായി കാത്തിരിക്കുകയാണ്.

ശവസംസ്കാരം മാറ്റിവെച്ചതിൻ്റെ ഔദ്യോഗിക കാരണം ഇറാൻ സർക്കാർ ഇതുവരെ പുറത്തുവിട്ടിട്ടില്ല. രാജ്യത്ത് നിലനിൽക്കുന്ന രാഷ്ട്രീയ സാഹചര്യങ്ങൾ, വർദ്ധിച്ചുവരുന്ന സുരക്ഷാപരമായ വെല്ലുവിളികൾ, അല്ലെങ്കിൽ ഒരു വലിയ ജനക്കൂട്ടത്തെ ഉൾക്കൊള്ളുന്നതിനുള്ള ക്രമീകരണങ്ങളിലെ കാലതാമസം എന്നിവയെല്ലാം ഇതിന് പിന്നിലുണ്ടാകാമെന്ന് രാഷ്ട്രീയ നിരീക്ഷകർ വിലയിരുത്തുന്നു. അത്യധികം പ്രാധാന്യമുള്ള ഒരു നേതാവിൻ്റെ അന്ത്യകർമ്മങ്ങളുമായി ബന്ധപ്പെട്ട തീരുമാനങ്ങൾ പലപ്പോഴും രാജ്യത്തിൻ്റെ ആഭ്യന്തര, വിദേശ നയങ്ങളിൽ വലിയ സ്വാധീനം ചെലുത്താറുണ്ട്.

ഈ മാറ്റിവെക്കൽ ഇറാനിയൻ രാഷ്ട്രീയത്തിൽ എന്ത് പ്രത്യാഘാതങ്ങൾ ഉണ്ടാക്കുമെന്നതിനെക്കുറിച്ചുള്ള ചർച്ചകൾ സജീവമാണ്. പൊതുജനങ്ങളിൽ ഇത് ഒരുതരം ആശങ്കയും അനിശ്ചിതത്വവും സൃഷ്ടിച്ചിട്ടുണ്ട്. ആയത്തുള്ള ഖമനേയിയുടെ പിൻഗാമി ആരെന്നതിനെക്കുറിച്ചുള്ള ഊഹാപോഹങ്ങൾക്കിടയിലാണ് ഈ പുതിയ വാർത്ത വരുന്നത്, ഇത് സ്ഥിതിഗതികളെ കൂടുതൽ സങ്കീർണ്ണമാക്കിയേക്കാം.

പുതിയ തീയതിയോ മറ്റ് വിശദാംശങ്ങളോ സംബന്ധിച്ച് ഔദ്യോഗിക അറിയിപ്പുകളൊന്നും ഇതുവരെ പുറത്തുവന്നിട്ടില്ല. ലോകമെമ്പാടുമുള്ള മാധ്യമങ്ങളും നയതന്ത്രജ്ഞരും ഇറാനിൽ നിന്നുള്ള ഓരോ നീക്കവും ശ്രദ്ധാപൂർവ്വം നിരീക്ഷിച്ചുകൊണ്ടിരിക്കുകയാണ്. ഇറാൻ്റെ രാഷ്ട്രീയ ഭാവിയെ സംബന്ധിച്ചിടത്തോളം ഈ തീരുമാനം നിർണായകമായേക്കാം.

Hashtags: #MalayoramNews #InternationalNews #IranNews #TehranNews #MiddleEast #KhameneiFuneral #AyatollahKhamenei

ഇറാൻ ഹോർമുസ് അടച്ചു, കപ്പലുകൾക്ക് നേരെ വെടിവയ്പ്പ് ഭീഷണി; കുവൈത്ത് വ്യോമപാത തുറന്നു #iran-shuts-hormuz-strait-threatens-ships-kuwait-opens-airspace

വാഷിങ്ടൻ ∙ തുടർച്ചയായ രണ്ടാം ദിവസവും പരസ്പരം ആക്രമിച്ച് യുഎസും ഇറാനും. ഉടൻ സമാധാന കരാറിൽ ഒപ്പുവച്ചില്ലെങ്കിൽ കൂടുതൽ ആക്രമണങ്ങൾ ഉണ്ടാകുമെന്ന് പ്രസിഡന്റ് ഡോണൾഡ് ട്രംപ് മുന്നറിയിപ്പ് നൽകി. ഈയാഴ്ചയാദ്യം ഹോർമുസ് കടലിടുക്കിനു സമീപം യുഎസിന്റെ അപ്പാച്ചി ഹെലികോപ്റ്റർ വെടിവച്ചിട്ടതോടെയാണു സംഘർഷം രൂക്ഷമായത്. ഇത് ഇറാനിലെയും മേഖലയിലെ യുഎസ് താവളങ്ങളിലെയും തുടർ ആക്രമണങ്ങൾക്കു വഴിവച്ചു.

ഫെബ്രുവരി അവസാനം യുഎസ്-ഇസ്രയേൽ സംയുക്ത വ്യോമാക്രമണത്തോടെ തുടങ്ങിയ യുദ്ധം ഇപ്പോൾ നാലാം മാസത്തിലാണ്. വ്യാഴാഴ്ച അർധരാത്രിക്കു ശേഷമാണ് ഇറാനിലുടനീളമുള്ള സൈനിക നിരീക്ഷണ സംവിധാനങ്ങൾ, ആശയവിനിമയ സംവിധാനങ്ങൾ, വ്യോമപ്രതിരോധ കേന്ദ്രങ്ങൾ എന്നിവ ലക്ഷ്യമിട്ട് ആക്രമണം നടത്തിയതെന്ന് യുഎസ് സെൻട്രൽ കമാൻഡ് അറിയിച്ചു. ആക്രമണം തുടങ്ങി നാലു മണിക്കൂറിനുശേഷം പൂർത്തിയായതായി സൈന്യം വ്യക്തമാക്കി. അതിനിടെ, സംഘർഷത്തെ തുടർന്ന് കുവൈത്ത് വ്യോമപാത താൽക്കാലികമായി അടച്ചെങ്കിലും പിന്നീടു തുറന്നു.

യുഎസ് വീണ്ടും ആക്രമണം നടത്തിയതിനു പിന്നാലെ തന്ത്രപ്രധാനമായ ഹോർമുസ് കടലിടുക്ക് അടയ്ക്കുകയാണെന്ന് ഇറാൻ പ്രഖ്യാപിച്ചിരുന്നു. എണ്ണക്കപ്പലുകളും വാണിജ്യ കപ്പലുകളും ഉൾപ്പെടെയുള്ള എല്ലാത്തരം ഗതാഗതങ്ങളും അവസാനിപ്പിച്ചതായി ഇറാന്റെ സൈനിക നേതൃത്വം അറിയിച്ചു. ഹോർമുസ് കടലിടുക്കിലൂടെ കടന്നുപോകുന്ന ഏത് കപ്പലിനു നേരെയും വെടിവയ്ക്കുമെന്ന് ഇറാന്റെ സംയുക്ത സൈനിക കമാൻഡ് മുന്നറിയിപ്പ് നൽകി. യുഎസിന്റെ രണ്ട് കപ്പലുകൾക്കു നേരെ ഇറാൻ വെടിയുതിർത്തതായി ഇറാൻ മാധ്യമങ്ങൾ റിപ്പോർട്ട് ചെയ്തു. എന്നാൽ കടലിടുക്ക് അടച്ചിട്ടില്ലെന്നും ഒരു കപ്പലിനും കേടുപറ്റിയിട്ടില്ലെന്നും യുഎസ് സെൻട്രൽ കമാൻഡ് പറയുന്നും. വാണിജ്യ കപ്പലുകൾ ഇപ്പോഴും കടലിടുക്കിലൂടെ സഞ്ചരിക്കുന്നുണ്ടെന്ന് അവർ അറിയിച്ചു.

സിരിക്, കർഗാൻ, ബന്ദർ അബ്ബാസ്, മിനാബ്, കരാജ് തുടങ്ങിയ നഗരങ്ങളിലും കാസ്പിയൻ കടലിനു സമീപമുള്ള വരമിനിലും സ്ഫോടനങ്ങൾ ഉണ്ടായതായി ഇറാൻ വാർത്താ ഏജൻസികൾ റിപ്പോർട്ട് ചെയ്തു. അമേരിക്കൻ സൈന്യം ഇറാനിലുടനീളം വ്യോമാക്രമണം നടത്തിയതിനു പിന്നാലെയാണ് ഹോർമുസ് അടയ്ക്കുന്നതായുള്ള ഇറാന്റെ പ്രഖ്യാപനം. ഇറാനെ കരാറിലേക്ക് നിർബന്ധിക്കാനാണ് ഈ നീക്കമെന്ന് യുഎസ് പ്രതിരോധ സെക്രട്ടറി പീറ്റ് ഹെഗ്സെത്ത് പറഞ്ഞു. ഇറാന് നേരെ സൈന്യം ശക്തമായ നടപടി സ്വീകരിക്കുമെന്ന് യുഎസ് പ്രതിരോധ സെക്രട്ടറി പീറ്റ് ഹെഗ്‌സെത്ത് നേരത്തെ മുന്നറിയിപ്പ് നൽകിയിരുന്നു. ആക്രമണ പരമ്പര ഒരു രാത്രികൊണ്ട് അവസാനിക്കില്ലെന്ന സൂചനയും അദ്ദേഹം നൽകി. ഇറാനിൽ കൂടുതൽ ആക്രമണങ്ങൾ ആരംഭിച്ചതായി യുഎസ് സൈന്യത്തിന്റെ സെൻട്രൽ കമാൻഡ് സ്ഥിരീകരിച്ചു. യുഎസിന്റെ എഫ്-16 യുദ്ധവിമാനത്തിന് നേരെ റവല്യൂഷനറി ഗാർഡ് മിസൈൽ തൊടുത്തതായി ഇറാൻ സൈന്യം പറഞ്ഞു.

Hashtags: #IranUSTension #HormuzStrait #MiddleEastConflict #DonaldTrump #InternationalNews #WorldNews #IranNews #USNews #ManoramaOnline