കേരളത്തിന്റെ രാഷ്ട്രീയ ചരിത്രത്തിൽ നിർണായക സ്വാധീനം ചെലുത്തിയ മുൻ മുഖ്യമന്ത്രിയും മുതിർന്ന കമ്യൂണിസ്റ്റ് നേതാവുമായ പിണറായി വിജയൻ ഇന്ന് തന്റെ പിറന്നാൾ ആഘോഷിക്കുകയാണ്. വിവിധ രാഷ്ട്രീയ, സാമൂഹിക, സാംസ്കാരിക മേഖലകളിൽ നിന്നുള്ള പ്രമുഖരും അണികളും അദ്ദേഹത്തിന് ഹൃദയം നിറഞ്ഞ പിറന്നാൾ ആശംസകൾ അറിയിച്ചിട്ടുണ്ട്.
കേരളത്തിന്റെ വികസന മുന്നേറ്റങ്ങളിൽ നിർണായക പങ്കുവഹിച്ച വ്യക്തിത്വമാണ് പിണറായി വിജയൻ. രണ്ട് തവണ സംസ്ഥാനത്തിന്റെ മുഖ്യമന്ത്രി പദവി വഹിച്ച അദ്ദേഹം, ജനകീയനായ നേതാവായി ശ്രദ്ധേയനായിരുന്നു. അദ്ദേഹത്തിന്റെ ഭരണനേതൃത്വത്തിൽ സംസ്ഥാനം നിരവധി വികസന പദ്ധതികൾക്ക് സാക്ഷ്യം വഹിച്ചു.
രാഷ്ട്രീയ എതിരാളികൾ പോലും അദ്ദേഹത്തിന്റെ ഭരണപാടവത്തെയും ദൃഢനിശ്ചയത്തെയും അംഗീകരിക്കാറുണ്ട്.
തറിയു’ടേയും തിറയുടെയും നാടായ കണ്ണൂരിന്റെ പരുക്കൻ മണ്ണിൽ നിന്നും, ജീവിതാവസ്ഥകളോട് പോരാടി വിപ്ലവപ്രസ്ഥാനത്തിലേക്ക് കടന്നുവന്ന പിണറായി വിജയൻ, സമരമുഖങ്ങളിൽ അണികൾക്ക് തളരാത്ത മനക്കരുത്തായിരുന്നു. അടിയന്തരാവസ്ഥക്കാലത്ത് പൊലീസിന്റെ ക്രൂര മർദ്ദനമേറ്റപ്പോഴും നിയമസഭയിൽ ചോരക്കറ പുരണ്ട കുപ്പായമുയർത്തി പ്രസംഗിച്ചപ്പോഴും, പതിനാറു വർഷക്കാലം സംസ്ഥാന സെക്രട്ടറി പദവി എന്ന നിലയിൽ പാർട്ടി നയിച്ചപ്പോഴും, മുഖ്യമന്ത്രിയെന്ന നിലയിൽ പ്രളയത്തെയും മഹാമാരിയായ കോവിഡിനെയും അതിജീവിച്ചപ്പോഴും, 2021ൽ രണ്ടാംവട്ടം ചരിത്രപരമായ ഭരണത്തുടർച്ച നേടിയപ്പോഴും അണികളുടെ ആവേശവും വിപ്ലവചിത്രവുമാണ് പിണറായി വിജയൻ.
കണ്ണൂർ ജില്ലയിലെ തലശ്ശേരി താലൂക്കിലെ പിണറായി പഞ്ചായത്തിലെ ഒരു കർഷക കുടുംബത്തിൽ കള്ള്-ചെത്ത് തൊഴിലാളിയായിരുന്ന മുണ്ടയിൽ മരോളി കോരന്റെയും ആലക്കണ്ടി കല്യാണിയുടെയും ഇളയ മകനായി ഇടവമാസത്തിലെ ചോതി നക്ഷത്രത്തിൽ 1945 മേയ് 24-ന് ജനനം. കുമാരനും നാണുവും ജ്യേഷ്ഠ സഹോദരങ്ങളാണ്. പതിനാല് സഹോദരങ്ങളിൽ രണ്ട് പേരൊഴികെ ബാക്കി എല്ലാവരും മരിച്ചു. രണ്ടാമത്തെ സഹോദരനായിരുന്ന കുമാരനിലൂടെയാണ് വിജയൻ കമ്മ്യൂണിസ്റ്റായത്. പിണറായി ശാരദ വിലാസം എൽ പി സ്കൂളിലും പെരളശേരി ഗവ.ഹൈസ്കൂളിലുമായി വിദ്യാഭ്യാസം. സ്കൂൾ ഫൈനലിനു ശേഷം ഒരു വർഷം നെയ്ത്ത് തൊഴിലാളിയായി. പിന്നീടാണ് പ്രീ- യൂണിവേഴ്സിറ്റി കോഴ്സിന് തലശ്ശേരി ബ്രണ്ണൻ കോളേജിൽ ചേർന്നത്.
തലശ്ശേരി സെന്റ് ജോസഫ്സ് സ്കൂൾ അദ്ധ്യാപിക ഒഞ്ചിയം കണ്ണൂക്കര സ്വദേശിനി ടി. കമലയാണ് ഭാര്യ. വിവേക് കിരൺ, വീണ എന്നിവർ മക്കൾ.
Hashtags: #PinarayiVijayan #KeralaPolitics #Birthday #പിണറായിവിജയൻ #കേരളരാഷ്ട്രീയം #പിറന്നാൾ
വാര്ത്തകളെ വാര്ത്തകളായി മാത്രം വായനക്കാരിലേക്ക് എത്തിക്കുന്ന ഒരു സ്വതന്ത്ര മാധ്യമ സംവിധാനമാണ് മലയോരം ന്യൂസ്.