കാർത്തികപ്പള്ളി: സമരത്തിന്റെ പേരിൽ സ്കൂൾ കുട്ടികളുടെ ഭക്ഷണത്തിൽ മണ്ണുവാരിയിട്ട് യൂത്ത് കോൺഗ്രസ് ക്രൂരത. കാർത്തികപ്പള്ളി ഗവ. യുപി സ്കൂളിലെ പഴയ കെട്ടിടത്തിന്റെ ഒരു ഭാഗം തകർന്നുവീണതിന്റെ പേരിൽ നടന്ന പ്രതിഷേധമാണ് അതിരുവിട്ടത്. ഉച്ചഭക്ഷണത്തിനായി തയ്യാറാക്കിവെച്ചിരുന്ന പാത്രങ്ങളും കസേരകളും യൂത്ത് കോൺഗ്രസുകാർ വലിച്ചെറിഞ്ഞു. ഭക്ഷണശാലയും പ്രവർത്തകർ തല്ലിത്തകർത്തു.
തിങ്കളാഴ്ച രാവിലെ സ്കൂളിലേക്ക് എത്തിയ പ്രവർത്തകർ വലിയ അക്രമമാണ് അഴിച്ചുവിട്ടത്. ക്ലാസ് മുറിയിൽ കുട്ടികൾ ഉള്ളപ്പോഴായിരുന്നു സമരാഭാസം. പൊലീസിന്റെ വിലക്ക് ലംഘിച്ച് ഗേറ്റ് തകർത്ത് ക്യാമ്പസിൽ കടന്ന പ്രതിഷേധക്കാർ കസേരകളെടുത്ത് എറിഞ്ഞു. അധ്യാപകരെ കയ്യേറ്റം ചെയ്യുകയും ഉപകരണങ്ങൾ തല്ലിത്തകർക്കുകയും ചെയ്തു. മാധ്യമപ്രവർത്തകർക്കും പരിക്കേറ്റു. യൂത്ത് കോൺഗ്രസ് ജില്ലാ പ്രസിഡന്റ് എം പി പ്രവീണിന്റെ നേതൃത്വത്തിലായിരുന്നു അക്രമം.
ഞായറാഴ്ചയാണ് കനത്ത മഴയെ തുടർന്ന് സ്കൂളിന്റെ പഴയ കെട്ടിടത്തിന്റെ മേൽക്കൂരയുടെ ഒരു ഭാഗം തകർന്നുവീണത്. യുഡിഎഫ് ഭരിക്കുന്ന പഞ്ചായത്ത് പുതിയ കെട്ടിട്ടത്തിന് ഫിറ്റ്നസ് സർട്ടിഫിക്കറ്റ് നൽകാത്തതാണ് പുതിയ കെട്ടിടത്തിലേക്ക് സ്കൂളിന്റെ പ്രവർത്തനം മാറ്റാൻ കാലതാമസം വന്നത്.
വാര്ത്തകളെ വാര്ത്തകളായി മാത്രം വായനക്കാരിലേക്ക് എത്തിക്കുന്ന ഒരു സ്വതന്ത്ര മാധ്യമ സംവിധാനമാണ് മലയോരം ന്യൂസ്.