പാകിസ്താനിൽ നിന്ന് ഡ്രോൺ വഴി മയക്കുമരുന്നും ആയുധങ്ങളും കടത്തുന്നത് തടയാൻ പഞ്ചാബ് സർക്കാർ; പഞ്ചാബ് ഡ്രോൺ വിരുദ്ധ സംവിധാനം വിന്യസിക്കും.#LATESTNEWS

 

പാകിസ്ഥാനിൽ നിന്ന് ഡ്രോണുകൾ വഴി മയക്കുമരുന്നും ആയുധങ്ങളും കടത്തുന്നത് തടയാൻ പഞ്ചാബ് സർക്കാർ. പഞ്ചാബിലെ പാകിസ്ഥാൻ അതിർത്തിയിൽ ആന്റി-ഡ്രോൺ സംവിധാനം വിന്യസിക്കും. പഞ്ചാബ് സർക്കാരാണ് നടപടി സ്വീകരിച്ചത്. ഡ്രോണുകൾ വഴിയുള്ള ആയുധങ്ങളും മയക്കുമരുന്ന് കടത്തും തടയുന്നതിന്റെ ഭാഗമായാണ് നടപടി. സെപ്റ്റംബർ അല്ലെങ്കിൽ ഒക്ടോബറോടെ ആന്റി-ഡ്രോൺ സംവിധാനം വിന്യസിക്കുമെന്ന് പോലീസ് ഡയറക്ടർ ജനറൽ ഗൗരവ് യാദവ് പറഞ്ഞു.

“ഇന്ത്യ-പാകിസ്ഥാൻ അതിർത്തിയിൽ ഞങ്ങൾ ആന്റി-ഡ്രോൺ സംവിധാനത്തിന്റെ പരീക്ഷണങ്ങൾ നടത്തിയിട്ടുണ്ട്, ഇക്കാര്യത്തിൽ ആഭ്യന്തര മന്ത്രാലയവുമായി ഞങ്ങളുടെ ഉദ്യോഗസ്ഥർ കൂടിക്കാഴ്ചകളും നടത്തിയിട്ടുണ്ട്. സെപ്റ്റംബർ അല്ലെങ്കിൽ ഒക്ടോബറോടെ, പഞ്ചാബ് അതിർത്തി സുരക്ഷാ സേനയുമായി ഏകോപിപ്പിച്ച് പ്രതിരോധത്തിന്റെ രണ്ടാം നിരയായി ആന്റി-ഡ്രോൺ സംവിധാനം സ്ഥാപിക്കും,” അദ്ദേഹം പറഞ്ഞു.

അതിർത്തിക്കപ്പുറത്ത് നിന്നുള്ള മയക്കുമരുന്ന്, ആയുധങ്ങൾ, വെടിക്കോപ്പുകൾ എന്നിവയുടെ കള്ളക്കടത്ത് തടയാൻ ഡ്രോൺ വിരുദ്ധ സാങ്കേതികവിദ്യ സഹായിക്കും. 5,500 ഹോം ഗാർഡുകളെ ഉടൻ നിയമിക്കുമെന്നും യാദവ് പറഞ്ഞു.

സംസ്ഥാനത്ത് നടന്നുകൊണ്ടിരിക്കുന്ന മയക്കുമരുന്ന് വിരുദ്ധ നടപടികളെക്കുറിച്ച് സംസാരിച്ച ഡിജിപി, മാർച്ച് 1 മുതൽ എൻ‌ഡി‌പി‌എസ് ആക്ട് പ്രകാരം ആകെ 4,659 എഫ്‌ഐ‌ആറുകൾ രജിസ്റ്റർ ചെയ്തിട്ടുണ്ടെന്നും 7,414 പേരെ അറസ്റ്റ് ചെയ്തിട്ടുണ്ടെന്നും പറഞ്ഞു.

297 കിലോ ഹെറോയിൻ, 10,000 കിലോ പോപ്പി ഹസ്ക്, 153 കിലോ കറുപ്പ്, 95 കിലോ കഞ്ചാവ്, 21.77 ലക്ഷം ഗുളികകൾ, 8 കോടി രൂപ പണം എന്നിവ പിടിച്ചെടുത്തതായി അദ്ദേഹം പറഞ്ഞു. സംസ്ഥാനത്ത് 755 മയക്കുമരുന്ന് ഹോട്ട്‌സ്‌പോട്ടുകൾ പോലീസ് തിരിച്ചറിഞ്ഞിട്ടുണ്ടെന്ന് യാദവ് പറഞ്ഞു.