പരിയാരം: ഡിവൈഎഫ്ഐ കണ്ണൂർ ജില്ലാ കമ്മിറ്റിയുടെ നേതൃത്വത്തിൽ കണ്ണൂർ ഗവ മെഡിക്കൽ കോളേജിൽ നടപ്പാക്കുന്ന ഡിവൈഎഫ്ഐയുടെ ഹൃദയപൂർവ്വം ഉച്ചഭക്ഷണ പദ്ധതി നാലാം വർഷത്തിലേക്ക്.അതിൻ്റെ ഭാഗമായി നടക്കുന്ന പൊ തിച്ചോർ ഡിവൈഎഫ്ഐ കണ്ണൂർ ജില്ലാ സെക്രട്ടറി അഡ്വ. സരിൻ ശശി ഉദ്ഘാടനം ചെയ്തു.
പൊതിച്ചോറിനൊപ്പം മധുരവും വിതരണം ചെയ്തു... സംസ്ഥാനത്താകമാനം ജില്ലാ ആശുപത്രികളിലും, മെഡിക്കൽ കോളേജുകളിലും ഡിവൈഎഫ്ഐ നടത്തി വരുന്ന പൊതിച്ചോർ വിതരണത്തെ മാതൃകയാക്കിയാണ് 2023 ഫെബ്രുവരി ആദ്യഘട്ടത്തിൽ കണ്ണൂർ ഗവ മെഡിക്കൽ കോളേജിൽ പൊതിച്ചോർ വിതരണം തുടങ്ങിയത്.ഡിവൈഎഫ് ഐയുടെ പ്രഥമ അഖിലേന്ത്യാ പ്രസിഡൻ്റായിരുന്ന ഇ പി ജയരാജനാണ് ഹൃദയപൂർവ്വം ഉച്ചഭക്ഷണ പദ്ധതി ഉദ്ഘാടനം ചെയ്തത്. രോഗികൾക്കും കൂട്ടിരിപ്പുകാർക്കും വേണ്ടി വീട്ടിൽ തയ്യാറാക്കി 950 പൊതിച്ചോറുകളിലധികമാണ് ഒരു ദിവസം പോലും മുടങ്ങാതെ എല്ലാ ദിവസവും വിതരണം ചെയ്തു കൊണ്ടിരിക്കുന്നത്.മൂന്ന് വർഷം സ്നേഹം പൊതിഞ്ഞ 10,40,250 പൊതിച്ചോർ ആണ് രോഗികൾക്കും കൂട്ടിരിപ്പുകാർക്കും മെഡിക്കൽ കോളേജിൽ വിതരണം ചെയ്തത്.
മികവുറ്റ സംഘാടനവുമായി പെരിങ്ങോം, മാടായി, പയ്യന്നൂർ, തളിപ്പറമ്പ്, പാപ്പിനിശ്ശേരി, ആലക്കോട്, ശ്രീകണ്ഠാപുരം ബ്ലോക്ക് കമ്മിറ്റികളുടെ കീഴിലുള്ള മേഖലാ കമ്മിറ്റികളാണ് യൂണിറ്റ് തലത്തിൽ നിന്ന് ഭക്ഷണം ശേഖരിച്ച് പൊതികൾ മെഡിക്കൽ കോളേജിൽ രോഗികൾക്കും കൂട്ടിരിപ്പുകാര്ക്കും വിതരണം ചെയ്യുന്നത്.കനത്ത മഴയായാലും കനത്ത വെയിലായാലും മറ്റേത് പ്രതിസന്ധിക്കിടയിലും ചുവപ്പ് നക്ഷത്രമുള്ള വെള്ളക്കൊടി പാറുന്ന വാഹനം കൃത്യം ഒരു മണിക്ക് മുമ്പേ തന്നെ മെഡിക്കൽ കോളേജ് ആശുപത്രി കവാടത്തിൽ ക്യൂ നിൽക്കുന്നവർക്ക് പൊതിച്ചോറ് നൽകാനെത്തുന്നത് ഇനിയും തുടരും.മാനവസ്നേഹത്തിൻ്റെ ഉദാത്ത മാതൃകയുമായി.ബ്ലോക്ക് ട്രഷറർ എം. സജേഷ് അധ്യക്ഷനായി സി പി ഷിജു, പി ജിതിൻ, പി കെ പ്രജീഷ്, സി വി ജിതിൻ രാജ്, ജി കെ അനുവിന്ദ്, ടിപി ആദർശ്, മിഥുൻ മോഹൻ എന്നിവർ സംസാരിച്ചു.
Kannur Government Medical College
വാര്ത്തകളെ വാര്ത്തകളായി മാത്രം വായനക്കാരിലേക്ക് എത്തിക്കുന്ന ഒരു സ്വതന്ത്ര മാധ്യമ സംവിധാനമാണ് മലയോരം ന്യൂസ്.