.png){kind=tracking}
ബെംഗളൂരു: ഐ.എസ്.ആർ.ഒ മുൻ ചെയർമാൻ ഡോ. കസ്തൂരിരംഗൻ (84) അന്തരിച്ചു. ബെംഗളൂരുവിൽ ആയിരുന്നു അന്ത്യം.ഒമ്പത് വർഷം ഐ.എസ്.ആർ.ഒയുടെ തലവനായിരുന്നു. കേന്ദ്രസർക്കാരിന്റെ ബഹിരാകാശ കമ്മീഷനിലും ബഹിരാകാശ വകുപ്പിലും സെക്രട്ടറിയായി സേവനമനുഷ്ഠിച്ചു.
1994 മുതൽ 2003 വരെ ഒമ്പത് വർഷം ഐ.എസ്.ആർ.ഒയുടെ ചെയർമാനായിരുന്നു അദ്ദേഹം. ഇന്ത്യയുടെ ചാന്ദ്ര ദൗത്യത്തിന്റെ പ്രാരംഭ ആസൂത്രണം അദ്ദേഹം ഐ.എസ്.ആർ.ഒ ചെയർമാനായിരിക്കെയായിരുന്നു. 2003 ഓഗസ്റ്റ് 27 ന് അദ്ദേഹം വിരമിച്ചു. തുടർന്ന് 2003 മുതൽ 2009 വരെ അദ്ദേഹം രാജ്യസഭാ എംപിയായി. രാജ്യം അദ്ദേഹത്തെ പത്മശ്രീ, പത്മഭൂഷൺ, പത്മവിഭൂഷൺ എന്നീ ബഹുമതികൾ നൽകി ആദരിച്ചു. ഇന്ത്യയുടെ ആസൂത്രണ കമ്മീഷൻ അംഗമായും ഐ.എസ്.ആർ.ഒ സാറ്റലൈറ്റ് സെന്ററിന്റെ ഡയറക്ടറായും അദ്ദേഹം സേവനമനുഷ്ഠിച്ചു.
പശ്ചിമഘട്ട സംരക്ഷണം ലക്ഷ്യമിട്ട് കേന്ദ്രസർക്കാരിന്റെ നിർദ്ദേശപ്രകാരം കസ്തൂരിരംഗന്റെ നേതൃത്വത്തിൽ തയ്യാറാക്കിയ റിപ്പോർട്ട് വളരെയധികം ചർച്ചകൾക്ക് വഴിയൊരുക്കിയിരുന്നു. ദേശീയ വിദ്യാഭ്യാസ നയത്തിലെ പരിഷ്കാരങ്ങളുടെ ചുക്കാൻ പിടിക്കുകയും ചെയ്തു.
ജവഹർലാൽ നെഹ്‌റു സർവകലാശാലയുടെ ചാൻസലർ, കർണാടക നോളജ് കമ്മീഷൻ ചെയർമാൻ എന്നീ സ്ഥാനങ്ങളും അദ്ദേഹം വഹിച്ചിട്ടുണ്ട്. ഇന്ത്യയുടെ ആദ്യത്തെ ഭൗമ നിരീക്ഷണ ഉപഗ്രഹങ്ങളായ ഭാസ്‌കര-1, ഭാസ്‌കര-2 എന്നിവയുടെ പ്രോജക്ട് ഡയറക്ടറായും അദ്ദേഹം സേവനമനുഷ്ഠിച്ചിട്ടുണ്ട്. പിഎസ്എൽവി, ജിഎസ്എൽവി വിക്ഷേപണങ്ങൾ പോലുള്ള പ്രധാന നാഴികക്കല്ലുകൾക്കും അദ്ദേഹം നേതൃത്വം നൽകി.
1940 ഒക്ടോബർ 24 ന് കൊച്ചിയിലെ ചിറ്റൂർ റോഡിലുള്ള ഒരു കമ്മ്യൂണിറ്റി ആശ്രമത്തിൽ കൃഷ്ണസ്വാമിയുടെയും വിശാലാക്ഷിയുടെയും മകനായി ജനിച്ച അദ്ദേഹത്തിന് ചെറുപ്പം മുതലേ ശാസ്ത്രത്തിൽ താൽപ്പര്യമുണ്ടായിരുന്നു. അഞ്ചാം ക്ലാസ് വരെ കേരളത്തിൽ പഠിച്ചു. പിന്നീട്, അച്ഛൻ ജോലി ചെയ്തിരുന്ന മുംബൈയിലേക്ക് താമസം മാറി. ബോംബെ സർവകലാശാലയിൽ നിന്ന് ഭൗതികശാസ്ത്രത്തിൽ ബിരുദാനന്തര ബിരുദവും പരീക്ഷണാത്മക ഹൈ-എനർജി ജ്യോതിശാസ്ത്രത്തിൽ ഡോക്ടറേറ്റും നേടി. അഹമ്മദാബാദിൽ വിക്രം സാരാഭായി സ്ഥാപിച്ച ഫിസിക്കൽ റിസർച്ച് ലബോറട്ടറിയിൽ ജോലി ചെയ്യുന്നതിനിടയിലാണ് അദ്ദേഹം ഈ നേട്ടം കൈവരിച്ചത്.
ബാംഗ്ലൂരിലെ ഫിസിക്കൽ റിസർച്ച് ലബോറട്ടറിയിലും ജവഹർലാൽ നെഹ്‌റു സെന്റർ ഫോർ അഡ്വാൻസ്ഡ് റിസർച്ചിലും ഓണററി പ്രൊഫസർ, കർണാടക നോളജ് കമ്മീഷൻ അംഗം, ബാംഗ്ലൂരിലെ നാഷണൽ ഇൻസ്റ്റിറ്റ്യൂട്ട് ഓഫ് അഡ്വാൻസ്ഡ് സ്റ്റഡീസിന്റെ ഡയറക്ടർ തുടങ്ങി നിരവധി സ്ഥാനങ്ങൾ അദ്ദേഹം വഹിച്ചിട്ടുണ്ട്.
വാര്ത്തകളെ വാര്ത്തകളായി മാത്രം വായനക്കാരിലേക്ക് എത്തിക്കുന്ന ഒരു സ്വതന്ത്ര മാധ്യമ സംവിധാനമാണ് മലയോരം ന്യൂസ്.