ട്രെയിനിൽ ടി.ടി.ഇ. യ്ക്ക് ക്രൂര മർദ്ദനം. രാജസ്ഥാൻ സ്വദേശി ടി.ടി.ഇ. ഡ്യൂട്ടിക്കിടെയാണ് വിക്രംകുമാർ മീണയ്ക്ക് മർദനമേറ്റത്. മംഗലാപുരത്ത് നിന്ന് തിരുവനന്തപുരത്തേക്ക് പോവുകയായിരുന്ന മാവേലി എക്‌സ്പ്രസിൽ തിരൂരിൽ വെച്ചാണ് സംഭവം. ടിടിഇയെ ആക്രമിച്ച തിരുവനന്തപുരം കരമന സ്വദേശി എസ്. സ്റ്റാലിനെ റെയിൽവേ പോലീസ് അറസ്റ്റ് ചെയ്തു. റിസർവേഷൻ കോച്ചിൽ ടിക്കറ്റില്ലാതെ യാത്ര നിരോധിച്ചതാണ് ആക്രമണത്തിന് കാരണമെന്നാണ് റിപ്പോർട്ട്. കോഴിക്കോട്ടുനിന്ന് ട്രെയിനിൽ കയറിയ പ്രതികൾ അവിടെനിന്ന് പ്രശ്‌നമുണ്ടാക്കിയതായി മർദനമേറ്റ ടി.ടി.ഇ പറഞ്ഞു. ജനറൽ കോച്ചിലേക്ക് മാറാൻ പലതവണ ആവശ്യപ്പെട്ടെങ്കിലും അദ്ദേഹം ചെവിക്കൊണ്ടില്ല. തുടർന്ന് പ്രകോപിതനായ യാത്രക്കാരൻ ടിടിഇയെ ക്രൂരമായി ആക്രമിക്കുകയായിരുന്നു.
കൈകൊണ്ട് തടഞ്ഞുനിർത്തിയ ശേഷം മൂക്കിനിടിച്ചെന്നാണ് ടി.ടി.ഇ.യുടെ പരാതിയിൽ പറയുന്നത്. മർദനമേറ്റ് ചോരയൊലിച്ച് നിൽക്കുന്ന ടി.ടി.ഇ.യുടെ ചിത്രങ്ങളും പുറത്തുവന്നിട്ടുണ്ട്. സംഭവത്തിന് പിന്നാലെ കോഴിക്കോട് റെയിൽവേ പോലീസിൽ വിവരമറിയിച്ചിരുന്നു. തുടർന്ന് തിരൂരിൽവെച്ച് പ്രതിയെ റെയിൽവേ പോലീസ് കസ്റ്റഡിയിലെടുത്തു. പരിക്കേറ്റ ടി.ടി.ഇ.യെ ഷൊർണൂരിലെ ആശുപത്രിയിൽ പ്രവേശിപ്പിച്ചു.
വാര്ത്തകളെ വാര്ത്തകളായി മാത്രം വായനക്കാരിലേക്ക് എത്തിക്കുന്ന ഒരു സ്വതന്ത്ര മാധ്യമ സംവിധാനമാണ് മലയോരം ന്യൂസ്.