ഐഎസ് ഭീകരസംഘം കേരളവും ലക്ഷ്യമിട്ടിരുന്നതായി എൻഐഎ അറിയിച്ചു. ഐഎസിന്റെ പ്രവർത്തനങ്ങൾക്ക് പണം സ്വരൂപിച്ച കേസിൽ അറസ്റ്റിലായവരെ ചോദ്യം ചെയ്തപ്പോഴാണ് വിവരം പുറത്തായത്. മുഖ്യപ്രതി തൃശൂർ മതിലകത്തുകുടിയിൽ ആഷിഫ് ഉൾപ്പെടെ നാലുപേരെ എൻഐഎ ചോദ്യം ചെയ്തുവരികയാണ്.
ആരാധനാലയങ്ങൾക്കും ചില സമുദായ നേതാക്കൾക്കും നേരെ ഭീകരാക്രമണം നടത്താൻ ഇവർ മൊഡ്യൂൾ ഗൂഢാലോചന നടത്തിയതായി എൻഐഎ കണ്ടെത്തി. ഇതിനായി ഇവർ രഹസ്യ നീക്കങ്ങൾ ആസൂത്രണം ചെയ്തിരുന്നതായും കണ്ടെത്തി. ‘പെറ്റ് ലവേഴ്സ്’ എന്ന പേരിൽ കൂട്ടായ്മ രൂപീകരിച്ച് സമൂഹമാധ്യമങ്ങളിലൂടെ ദേശവിരുദ്ധ പ്രവർത്തനങ്ങൾ നടത്തിവരികയായിരുന്നു ഇവർ.
ബാങ്ക് കവർച്ചയിലൂടെയും ജ്വല്ലറി മോഷണത്തിലൂടെയും തീവ്രവാദ പ്രവർത്തനങ്ങൾക്ക് പണം കണ്ടെത്താനും പദ്ധതിയിട്ടിരുന്നു. ചില എടിഎം കവർച്ചകളിലും ഇവരുടെ പങ്കും അന്വേഷിക്കുന്നുണ്ട്. മത സ്പർദ്ധ വളർത്തുന്നതിനായി ആക്രമിക്കേണ്ട സ്ഥാപനങ്ങളുടെയും വ്യക്തികളുടെയും പട്ടികയും ഇവർ തയ്യാറാക്കിയിരുന്നു.
കഴിഞ്ഞ ദിവസം ഐസിസ് മൊഡ്യൂളിൽ ഉൾപ്പെട്ട ഒരു രഹസ്യ സംഘത്തെ പിടികൂടാൻ കേരളത്തിലെ തൃശ്ശൂരിലും പാലക്കാട്ടും എൻഐഎ റെയ്ഡ് നടത്തിയിരുന്നു. കേരള പൊലീസിലെ തീവ്രവാദ വിരുദ്ധ സേനയുടെ (എടിഎസ്) സഹായത്തോടെ നടത്തിയ സംയുക്ത ഓപ്പറേഷനിൽ തൃശൂർ സ്വദേശികളായ സയ്യിദ് നബീൽ അഹമ്മദ്, ടി. ഷിയാസ് തൃശൂരിലെ വിവിധ സ്ഥലങ്ങളിൽ നിന്നും പി എ റയീസ് പാലക്കാട്ടു നിന്നുമാണ് പിടിയിലായത്. ഇവരുടെ സംഘത്തലവൻ മതിലകത്ത് കുടിൽ ആഷിഫിനെ സത്യമംഗലം വനത്തിൽ നിന്നാണ് പിടികൂടിയത്. ഷിയാസ്, നബീൽ, റയീസ് എന്നിവരുടെ വീടുകളിൽ നിന്ന് വിദ്വേഷകരമായ ഉള്ളടക്കം അടങ്ങിയ ഡിജിറ്റൽ ഉപകരണങ്ങളും രേഖകളും പിടിച്ചെടുത്തു. ഇവർക്കെതിരെ യുഎപിഎ പ്രകാരം കേസെടുക്കും.
വാര്ത്തകളെ വാര്ത്തകളായി മാത്രം വായനക്കാരിലേക്ക് എത്തിക്കുന്ന ഒരു സ്വതന്ത്ര മാധ്യമ സംവിധാനമാണ് മലയോരം ന്യൂസ്.