• സംസ്ഥാനത്ത് ഇന്നും മ‍ഴയ്ക്ക് സാധ്യത. ഇന്ന് 5 ജില്ലകളിൽ മ‍ഴ മുന്നറിയിപ്പ്
നിലനിൽക്കുന്നുണ്ട്. പത്തനംതിട്ട, ഇടുക്കി, പാലക്കാട്, മലപ്പുറം, വയനാട്
ജില്ലകളിലാണ് കേന്ദ്ര കാലാവസ്ഥാ വകുപ്പ് യെല്ലോ അലർട്ട് പ്രഖ്യാപിച്ചത്.
• ശ്രീലങ്കയിൽ നാശം വിതച്ച് ദിത്‌വാ ചുഴലിക്കാറ്റ്.
വെള്ളപ്പൊക്കത്തിലും മണ്ണിടിച്ചിലിലും 80 ലധികം പേർ മരിച്ചു.
ശ്രീലങ്കയ്ക്ക് സഹായവുമായി ഇന്ത്യ 'ഓപ്പറേഷൻ സാഗർ ബന്ധു' ആരംഭിച്ചു.
നാവികസേനയുടെ വിമാനവാഹിനിക്കപ്പലായ ഐഎൻഎസ് വിക്രാന്തും ഐഎൻഎസ് ഉദയ്ഗിരിയും
വഴി ദുരിതാശ്വാസ സാമഗ്രികൾ എത്തിച്ചു.
• കേരള സംസ്ഥാന ചലച്ചിത്ര അക്കാദമി സംഘടിപ്പിക്കുന്ന 30-ാമത്
ഐ.എഫ്.എഫ്.കെയ്ക്ക് 2025 ഡിസംബര്‍ 12 വെള്ളിയാഴ്ച വൈകിട്ട് ആറു മണിക്ക്
തിരുവനന്തപുരം നിശാഗന്ധി ഓഡിറ്റോറിയത്തില്‍ തിരി തെളിയും. ഡിസംബര്‍ 19 വരെ
എട്ടു ദിവസങ്ങളിലായി നടക്കുന്ന മേളയില്‍ എഴുപതോളം രാജ്യങ്ങളില്‍നിന്നുള്ള
200ല്‍പ്പരം ചിത്രങ്ങള്‍ പ്രദര്‍ശിപ്പിക്കും.
• അതിജീവിതയുമായി ബന്ധമുണ്ടെന്ന് സമ്മതിച്ച് രാഹുൽ മാങ്കൂട്ടത്തിൽ. താൻ
സമര്‍പ്പിച്ച മുൻകൂര്‍ ജാമ്യാപേക്ഷയിലാണ് രാഹുല്‍ മാങ്കൂട്ടത്തില്‍
ഇക്കാര്യം സമ്മതിച്ചത്. അതിജീവിത ഫേസ്ബുക്കിലൂടെയാണ് തന്നെ
ബന്ധപ്പെട്ടതെന്ന് രാഹുൽ മാങ്കൂട്ടത്തില്‍ മുൻകൂര്‍ ജാമ്യാപേക്ഷയില്‍
പറഞ്ഞു.
• കർണാടകയിലെ ഭരണപരമായ തർക്കങ്ങൾക്കിടെ ഇന്ന് നിർണ്ണായകമായ ചർച്ച നടക്കും.
ഹൈക്കമാൻഡിന്റെ നിർദ്ദേശപ്രകാരം മുഖ്യമന്ത്രി സിദ്ധരാമയ്യയും
ഉപമുഖ്യമന്ത്രി ഡി കെ ശിവകുമാറും ഇന്ന് കൂടിക്കാഴ്ച നടത്തും. പ്രഭാത
ഭക്ഷണത്തിനായാണ് സിദ്ധരാമയ്യ ഡി കെ ശിവകുമാറിനെ തന്റെ വസതിയിലേക്ക്
ക്ഷണിച്ചിരിക്കുന്നത്.
• വിവേചനപരമായ ഒഴിവാക്കലുകള്‍ ആവര്‍ത്തിച്ച് എന്‍സിഇആര്‍ടി. നേരത്തെ
മുഗള്‍ ചരിത്രം, ഗാന്ധി വധം, ഗോധ്രാ കാലപം എന്നിവ ഒഴിവാക്കി വിവാദം
സൃഷ്ടിച്ച എന്‍സിഇആര്‍ടി ഇത്തവണ എട്ടാം ക്ലാസ് പാഠപുസ്തകത്തില്‍ നിന്ന്
ദക്ഷിണേന്ത്യന്‍ ചരിത്രം വെട്ടി.
• എയർബസ് എ320 ഫാമിലി വിമാനങ്ങളുടെ ഫ്ലൈറ്റ് കൺട്രോളുമായി ബന്ധപ്പെട്ട്
കണ്ടെത്തിയ സാങ്കേതിക പ്രശ്നം പരിഹരിക്കുന്നതിലെ കാലതാമസം കാരണം രാജ്യത്തെ
വിമാന സർവീസുകളെ ബാധിക്കുമെന്ന് റിപ്പോർട്ട്. ഇൻഡിഗോ, എയർ ഇന്ത്യ, എയർ
ഇന്ത്യ എക്സ്‌പ്രസ് എന്നീ വിമാനക്കമ്പനികളുടെ ഏകദേശം 200 മുതൽ 250 വരെ
വിമാനങ്ങളുടെ പ്രവർത്തനത്തെ ഇത് നേരിട്ട് ബാധിക്കുമെന്നാണ് അധികൃതർ നൽകുന്ന
സൂചന.
• മുല്ലപ്പെരിയാര്‍ അണക്കെട്ടില്‍ ജലനിരപ്പ് ഉയരുന്ന പശ്ചാത്തലത്തില്‍
കൂടുതല്‍ ജലം കൊണ്ടുപോകണമെന്ന് ആവശ്യപ്പെട്ട് തമിഴ്‌നാടിന് കത്തയച്ചതായി
മന്ത്രി റോഷി അഗസ്റ്റിന്‍ അറിയിച്ചു. ഇതേത്തുടര്‍ന്ന് ഇന്നലെ മുതല്‍
തമിഴ്‌നാട് ടണല്‍ വഴി കൂടുതല്‍ ജലം കൊണ്ടുപോയിത്തുടങ്ങിയതായും മന്ത്രി
അറിയിച്ചു.
വാര്ത്തകളെ വാര്ത്തകളായി മാത്രം വായനക്കാരിലേക്ക് എത്തിക്കുന്ന ഒരു സ്വതന്ത്ര മാധ്യമ സംവിധാനമാണ് മലയോരം ന്യൂസ്.