പഹല്‍ഗം ഭീകരാക്രമണം;ഭീകരർക്കെതിരെയുള്ള നടപടികൾ ശക്തമാക്കി .#pehelgam_terrorist_attack

 

ജമ്മു കശ്മീരിൽ ആഭ്യന്തര ഭീകരർക്കെതിരായ നടപടികൾ ശക്തമാക്കിവരികയാണ്. ഷോപ്പിയാനിലും പുൽവാമയിലും ജമ്മു കശ്മീർ ഭീകരർക്കെതിരെയുള്ള നടപടികൾ ശക്തമാക്കി. ഭീകരരായ അദ്നാൻ ഷാഫി ദാ, ഷാഹിദ് അഹമ്മദ് കുട്ടായി എന്നിവരുടെ വീടുകൾ തകർത്തു. ആഭ്യന്തര മന്ത്രാലയത്തിന്റെ നിർദ്ദേശപ്രകാരം നടപടി തുടരുകയാണ്.

ഇതുവരെ 7 ഭീകരരുടെ വീടുകൾ തകർത്തു. ശ്രീനഗറിൽ തീവ്രവാദ ബന്ധമുള്ള 60-ലധികം പേരുടെ വീടുകളിൽ റെയ്ഡുകൾ നടത്തി. അനന്ത്നാഗിൽ തീവ്രവാദ ബന്ധമുള്ള 175 പേരെ കസ്റ്റഡിയിലെടുത്തു. അതേസമയം, കുപ്വാരയിൽ ഒരു സാമൂഹിക പ്രവർത്തകന് നേരെ തീവ്രവാദികൾ വെടിയുതിർത്തു. ഗുലാം റസൂൽ മാഗ്രെയ്ക്ക് വെടിയേറ്റു. ശനിയാഴ്ച ഗുലാം റസൂൽ മാഗ്രെയുടെ വസതിയിൽ എത്തിയപ്പോഴാണ് വെടിവയ്പ്പ് നടന്നത്. പരിക്കേറ്റ ഗുലാം റസൂൽ മാഗ്രെയെ ആശുപത്രിയിലേക്ക് മാറ്റി.

പഹൽഗാമിൽ തീവ്രവാദികൾക്കായുള്ള തിരച്ചിൽ സേന ഊർജിതമാക്കി. തെക്കൻ കശ്മീരിൽ നിന്നുള്ള 14 ഭീകരരെ കേന്ദ്രീകരിച്ചാണ് അന്വേഷണം പ്രധാനമായും കേന്ദ്രീകരിച്ചിരിക്കുന്നത്. അന്വേഷണ സംഘം അന്വേഷിക്കുന്ന 14 പേർ ലഷ്‌കർ-ഇ-തൊയ്ബ, ജെയ്ഷ്-ഇ-മുഹമ്മദ്, ഹിസ്ബുൾ മുജാഹിദീൻ തുടങ്ങിയ ഭീകര സംഘടനകളുമായി ബന്ധമുള്ളവരാണ്. ഇവർ അനന്ത്‌നാഗ്, ഷോപ്പിയാൻ, പുൽവാമ ജില്ലകളിൽ നിന്നുള്ളവരാണ്. ഇതിൽ 8 പേർ ലഷ്‌കർ-ഇ-തൊയ്ബയും മൂന്ന് പേർ വീതം ജയ്ഷ്-ഇ-മുഹമ്മദ്, ഹിസ്ബുൾ മുജാഹിദീൻ ഭീകരരുമാണ്.

അനന്ത്നാഗിലെ ഹിസ്ബുൾ ചീഫ് ഓപ്പറേഷണൽ കമാൻഡർ സുബൈർ അഹമ്മദ് വാണി, പാക് അധിനിവേശ കശ്മീരിൽ പരിശീലനം നേടിയ ഹരുൺ റാഷിദ് ഘാനി, കുൽഗാമിലെ ടിആർഎഫ് ഭീകരൻ സുബൈർ അഹമ്മദ് ഘാനി എന്നിവരും അന്വേഷണ സംഘത്തിന്റെ പട്ടികയിലുണ്ട്. ത്രാലിലെ ആസിഫ് ഷെയ്ക്ക്, ബ്രിജ് ബെഹാറിലെ ആദിൽ ഗുരി, കുൽഗാമിലെ സാക്കിർ ഘാനി എന്നിവരേയും അന്വേഷിക്കുന്നുണ്ട്. പഹൽഗാം ഭീകരാക്രമണത്തിന് മുമ്പ് തന്നെ ഇവർ താഴ്‌വരയിൽ സജീവമായിരുന്നുവെന്ന് അന്വേഷണ ഏജൻസികൾക്ക് വിവരം ലഭിച്ചിട്ടുണ്ട്.