തിരുവനന്തപുരം: ജൂലൈ മാസത്തെ ക്ഷേമ പെൻഷൻ വിതരണം വെള്ളിയാഴ്ച ആരംഭിക്കുമെന്ന് ധനമന്ത്രി കെ എൻ ബാലഗോപാൽ പ്രഖ്യാപിച്ചു. ഇതിനായി 831 കോടി രൂപ അനുവദിച്ചിട്ടുണ്ട്. ഏകദേശം 62 ലക്ഷം പേർക്ക് 1600 രൂപ വീതം ലഭിക്കും.
26 ലക്ഷത്തിലധികം ആളുകളുടെ ബാങ്ക് അക്കൗണ്ടുകളിലേക്ക് തുക എത്തും. സഹകരണ ബാങ്കുകൾ വഴി മറ്റുള്ളവരുടെ വീടുകളിൽ പെൻഷൻ കൈമാറും. ദേശീയ പെൻഷൻ പദ്ധതിയുടെ കേന്ദ്ര വിഹിതം 8.46 ലക്ഷം പേർക്ക് കേന്ദ്ര സർക്കാർ നൽകും. ഇതിനായി സംസ്ഥാനം 24.31 കോടി രൂപ മുൻകൂർ അടിസ്ഥാനത്തിൽ അനുവദിച്ചിട്ടുണ്ട്. ഈ വിഹിതം കേന്ദ്ര സർക്കാരിന്റെ പിഎഫ്എംഎസ് സംവിധാനം വഴി ഗുണഭോക്താക്കളുടെ ബാങ്ക് അക്കൗണ്ടുകളിലേക്ക് ക്രെഡിറ്റ് ചെയ്യും.
രണ്ടാം പിണറായി സർക്കാരിന്റെ നാല് വർഷത്തെ കാലയളവിൽ സാമൂഹിക സുരക്ഷാ പെൻഷൻ നൽകുന്നതിനായി ആകെ 38,500 കോടി രൂപ ചെലവഴിച്ചു. 2016-21 ലെ എൽഡിഎഫ് സർക്കാരിന്റെ കാലത്ത് ക്ഷേമ പെൻഷനായി 35,154 കോടി രൂപ വിതരണം ചെയ്തു, ഇതിൽ യുഡിഎഫ് സർക്കാരിന്റെ കാലത്തെ 18 മാസത്തെ കുടിശ്ശികയും ഉൾപ്പെടുന്നു. ഒമ്പത് വർഷത്തിനുള്ളിൽ ഒന്നും രണ്ടും പിണറായി സർക്കാരുകൾ ക്ഷേമ പെൻഷനായി 73,654 കോടി രൂപ വിതരണം ചെയ്തു. 2011-16 ലെ യുഡിഎഫ് സർക്കാരിന്റെ കാലത്ത് ക്ഷേമ പെൻഷനായി വിതരണം ചെയ്ത ആകെ തുക 9,011 കോടി രൂപയായിരുന്നു.
വാര്ത്തകളെ വാര്ത്തകളായി മാത്രം വായനക്കാരിലേക്ക് എത്തിക്കുന്ന ഒരു സ്വതന്ത്ര മാധ്യമ സംവിധാനമാണ് മലയോരം ന്യൂസ്.