തിരുവനന്തപുരം: സംസ്ഥാനത്ത് ശക്തമായ മഴ തുടരുന്നു. അഞ്ച് ജില്ലകളിൽ ഇന്ന് റെഡ് അലർട്ട്. മലപ്പുറം, കോഴിക്കോട്, വയനാട്, കണ്ണൂർ, കാസർകോട് ജില്ലകളിൽ റെഡ് അലർട്ട്. പത്തനംതിട്ട, കോട്ടയം, ഇടുക്കി, എറണാകുളം, തൃശൂർ, പാലക്കാട് ജില്ലകളിൽ ഓറഞ്ച് അലർട്ട്. തിരുവനന്തപുരം, കൊല്ലം, ആലപ്പുഴ ജില്ലകളിലും യെല്ലോ അലർട്ട് പ്രഖ്യാപിച്ചു.
പതിനൊന്ന് ജില്ലകളിലെ വിദ്യാഭ്യാസ സ്ഥാപനങ്ങൾക്ക് ഇന്ന് ജില്ലാ കളക്ടർ അവധി പ്രഖ്യാപിച്ചു. എറണാകുളം, കോട്ടയം, പത്തനംതിട്ട, ഇടുക്കി, തൃശൂർ, പാലക്കാട്, മലപ്പുറം, കോഴിക്കോട്, വയനാട്, കണ്ണൂർ, കാസർകോട് ജില്ലകളിലെ വിദ്യാഭ്യാസ സ്ഥാപനങ്ങൾക്ക് ജില്ലാ കളക്ടർമാർ അവധി പ്രഖ്യാപിച്ചു. അങ്കണവാടികൾക്കും ട്യൂഷൻ സെന്ററുകൾക്കും അവധി ബാധകമാണ്
കനത്ത മഴ കാരണം നിരവധി ട്രെയിനുകൾ വൈകിയാണ് ഓടുന്നത്. പലയിടത്തും പാളങ്ങളിൽ മരങ്ങൾ കടപുഴകി വീണതായി സൂചനയുണ്ട്. വേണാട് എക്സ്പ്രസ് 2 മണിക്കൂർ വൈകിയാണ് ഓടുന്നത്. ചെന്നൈ എഗ്മോർ എക്സ്പ്രസ് ഏകദേശം 50 മിനിറ്റ് വൈകിയാണ് ഓടുന്നത്. തിരുവനന്തപുരം അമൃത എക്സ്പ്രസും 50 മിനിറ്റ് വൈകിയാണ് ഓടുന്നത്.
പൊതുജനങ്ങൾക്കുള്ള കളക്ടറുടെ പ്രത്യേക അറിയിപ്പ് :
1 . കനത്ത മഴ ലഭിക്കുന്ന മലയോര പ്രദേശങ്ങളിൽ മണ്ണിടിച്ചിൽ, വെള്ളപ്പൊക്കം എന്നിവയ്ക്ക് സാധ്യതയുള്ള പ്രദേശങ്ങളിൽ താമസിക്കുന്നവർ സുരക്ഷിത സ്ഥലങ്ങളിലേക്ക് മാറണം.
2. വെള്ളപ്പൊക്ക സാധ്യതയുള്ള താഴ്ന്ന പ്രദേശങ്ങളിൽ താമസിക്കുന്നവർ സ്ഥിതിഗതികൾ വിലയിരുത്തി തയ്യാറാക്കിയ ക്യാമ്പുകളിലേക്ക് മാറണം.
3. ശക്തമായ കാറ്റിനുള്ള സാധ്യത കണക്കിലെടുത്ത്, സുരക്ഷിതമല്ലാത്ത വീടുകളിൽ താമസിക്കുന്നവരും ദുർബലമായ മേൽക്കൂരയുള്ള വീടുകളിൽ താമസിക്കുന്നവരും പ്രത്യേകം ശ്രദ്ധിക്കണം. അപകടകരമായ സാഹചര്യം മുൻകൂട്ടി കണ്ട് അധികാരികളെ ബന്ധപ്പെടുകയും സുരക്ഷിത സ്ഥലങ്ങളിലേക്ക് മാറുകയും വേണം.
4. കനത്ത മഴയുള്ളപ്പോൾ, നദികൾ മുറിച്ചുകടക്കുക, നദികളിലോ മറ്റ് ജലാശയങ്ങളിലോ കുളിക്കുക, ഒരു സാഹചര്യത്തിലും മത്സ്യബന്ധനം നടത്തുക, മറ്റ് ആവശ്യങ്ങൾക്ക് പോകുക എന്നിവ അനുവദനീയമല്ല.
5.കനത്ത മഴയുള്ളപ്പോൾ, കഴിയുന്നത്ര അനാവശ്യ യാത്രകൾ ഒഴിവാക്കുക. മഴ മുന്നറിയിപ്പ് പിൻവലിക്കുന്നതുവരെ വെള്ളച്ചാട്ടങ്ങൾ, ജലാശയങ്ങൾ, കുന്നിൻ പ്രദേശങ്ങൾ എന്നിവയിലേക്കുള്ള വിനോദ യാത്രകൾ ഒഴിവാക്കണം.
6. കനത്ത മഴയുണ്ടായാൽ, റോഡ് അപകടങ്ങൾ ഉണ്ടാകാനുള്ള സാധ്യത മുൻകൂട്ടി കാണണം.
വിവിധ തീരങ്ങളിൽ കടൽ തിരമാലകൾ രൂക്ഷമാകാൻ സാധ്യതയുള്ളതിനാൽ, അപകടമേഖലകളിൽ താമസിക്കുന്നവർ ജാഗ്രത പാലിക്കണം.
7. റെഡ്, ഓറഞ്ച് അലർട്ടുകൾ പുറപ്പെടുവിച്ചിട്ടുള്ള ജില്ലകളിൽ തുടർച്ചയായി കനത്ത മഴ പെയ്യുന്ന സാഹചര്യത്തിൽ, ദുരിതാശ്വാസ ക്യാമ്പുകൾ മുൻകൂട്ടി സ്ഥാപിക്കണം. തങ്ങളുടെ പ്രദേശത്ത് ദുരിതാശ്വാസ ക്യാമ്പിനായി കണ്ടെത്തിയ കെട്ടിടത്തെക്കുറിച്ച് ബന്ധപ്പെട്ട റവന്യൂ, തദ്ദേശ സ്വയംഭരണ സ്ഥാപനങ്ങളിൽ നിന്ന് മുൻകൂട്ടി വിവരങ്ങൾ നേടുകയും അതിലേക്കുള്ള സുരക്ഷിതമായ വഴി മനസ്സിലാക്കുകയും വേണം.
വാര്ത്തകളെ വാര്ത്തകളായി മാത്രം വായനക്കാരിലേക്ക് എത്തിക്കുന്ന ഒരു സ്വതന്ത്ര മാധ്യമ സംവിധാനമാണ് മലയോരം ന്യൂസ്.